Poeta ttikia

Borda, Itxaro

 1

 Uste duka poeta ahoan dukan hitza

 Lurretik kanpo sortu lore lehorra dela?

 Uste duka poeta gizon hauen bizitza

 Dugula zauri gabe doan ibai epela?

 2

 Hitzari kendu eta minak dakarren hatsa

 Aipa ezak haizea, aipa ezak egurra:

 Beldur ote haiz bihar bi begien arratsa

 Joan ondoan dela zikinduko elurra?

 3

 Edozein hitzen sena bete zak maitasunez

 Hastiro gaituk beraz ez hadila hain kexa

 Jantzi ezak arrosez, nahiz eta asunez.

 4

 Ordea baldin baduk bihotzean parada

 Olerkari otoi ez gaitzakala mexprexa:

 Gu ere bizi gaituk, ez ongi behar bada!