Kontzientziaren ikertzea
Borda, Itxaro
1
Gertatzen bait da kaseta huntan bertso batzu agertzea
Astero hemen irakurtzen da beti bat edo bertzea
Hasten dut orain kontzientziaren barnetikan ikertzea
Nahiko nuke gaurko solasak gehienek ulertzea.
2
Aspaldi jada gure Herrian agertu ziren bertsoak
Bertsolari bat manatu zuen kontzientziaren besoak
Zion goraki goxo zirela bai Jesus Jaunaren soak
Gerg galdatuz: «hiltzale bati nola barkatu Jainkoak?»
3
Solas horretan dago neretzat segur nahiko hezurra
Gazte naizela diozu eta duda mudan ez zuhurra...
Ezin ditake zuzendu ahal ibili dena makurra
Beraz Jaunaren urrikalmendu hura ere da gezurra.
4
Bigarren koplak inarrosiak derauzkit sendimenduak
«Hiltzale batek nun ote dauzka arima salbamenduak
Zangopilatu ta ostikatu ondoan manamenduak?...»
Holako hitzak ez dira nehoiz Jainkozalen zimenduak...
5
Gure lurrean biolentzia da denetan zilegia
Ikusi nahi duenak aski du zabaltzea begia
Dirudunak gaur aritzen dira gure aide alegia
Ordea beren gerizatzeko egina dute legia...
6
Gaurko mendean guti girare sozietatea gabe
Hura jarri da gure ahalen ta gure nahien jabe
Morroin berriak, ezer besterik, lurra bihurturik habe
Nolaz ez daike molde guzitan biolentziaren kabe...
7
Kaseta idek, tebista pitz edo karriketan ibil
Beha gizona aberetua begiak hetsirik dabil
Toki orotan, bortizkeria, heinekoa beti ixil
Barneko hutsa bete nahian hola batek behar du hil!
8
Dirua nasai, salerospena eta zapalkuntza hotza
Askotan gabiltz zehar bidean gizarteari arrotza
Haurrak botatu, zaharrak eho, hil-herri batzuen botza
Atomikari zabal geroa... nun dago gure bihotza?
9
Beharko dugu gizarte gazte eta garbi bat aamatu
Ekonomiko egoera hat arrunt berria surmatu
Diruarentzat egin bizia ez dezagula famatu
Mundu zaharra etorkizunaz atzo zeraiku amatu.
10
Adiskideak egin bertsoak beraz ezin ditut onhar
Segur behar da bi aldetarik ez jujatzeko asko kar
Biolentziak, biolentzia uhain berean bait dakar
Amodioak nortasun galdu hortarik dezala ekar!
11
Kristau girenaz geroz guziak baztertu dezazun herra
Besten hiltzéra, hain da errexa, nehola ez gaiten lerra
Elger mintzatuz aztertu zagun aurkia eta binperra
Ez dadin izan etsimendua gure barneko maixterra.