Kolorado-ko bertsoak

Borda, Itxaro

 1

 Grand-Junction-en bizi da Manex Urruty

 Apaldi artzain joanik herritik urruti

 Eskaini deraitana ez baita gauz guti

 Haren agurtzerako gaitezela zuti.

 2

 Munduan barreiatu euskaldunak fidel

 Elgarrekilan daude beterikan sakel

 Ipar Ameriketan bihotza dut epel

 Maite zaitudalako bietan Urepel!

 3

 Xalbadorren omenez etorririk horra

 Urruty-k hurbildurik zerasatan gora

 «Bertsolari gaztea jin Koloradora!»

 Ehun dolar eskuan erran nion «nora»...

 4

 Hiru-hogoi hamalau urtetan zer zaina

 Donazahartar sortzez da Manex Artzaina

 Irria ezpainetan garbi buru gaina

 Euskaldunentzat beti zutik du mahaina!

 5

 Basamortuan artzain ardi troparekin

 Bost urtez egona da beste lagunekin

 Lo eginez ardura begitto batekin

 Sahetsean pistole kargatuarekin!

 6

 Munduan zehar dauka ezagun andana

 Ezin ditzazke berak erran bana-bana!

 Segreturiken ez du etzaitez engana:

 Leu orenetan jeikiz hasi gogor lana...

 7

 Euskaldun denak nolaz dezake konpreni

 Arrazen berextee etzaio komeni;

 Hortako hartua du iduri zait eni

 Mexikan emaztea Velazquez'tar Bennie...

 8

 Antxeran erosi-ta lur pixka bat hole

 Aberestu egin da berak daki nola

 Lur pean aurkiturik nolazpait petrola

 Huna gure Urruty errege dagola!

 9

 Nahiko kantua ta euskaldun musika

 Atean: gure jaunak gaitzan benedika

 Baratzean baditu igelak gaindika

 Baina ezin ikasi haiek igerika...

 10

 «Errexa zaio hori aberats zen ta!»

 Euskaldun seme denak egin dezan kanta

 Elgarri eskuz esku munduan eman-ta

 Manex-ek altxatu du plaza bat xarmanta!

 11

 Euskal artzainak dira lur zabal guzian:

 Kosmonotek zituzten aurkitu ârgian

 Ardiekin batera hantxet ilargian

 Ari zirenak bake haunditan musian...

 12

 Ta dolarrak segurki ezarriak metan

 Altzairuzko kutxetan prestuki banketan

 Euskaldunek beharko ginuke denetan

 Aitatxi aberats bat han Ameriketan...