inprimatu
Amodiozko poema
Izenburua:
Amodiozko poema
Sinadura:
Borda, Itxaro
Urkizaren iruzkina:
Egilea(k):
Borda, Itxaro

Argitalpena:
Zeruko Argia.
Urtea:
1978
Argitalpenaren urtea:
Alea:
802.zk.
Orrialdea:
40

 

 

 

 

faksimilea ikusteko


Amodiozko poema

 

Borda, Itxaro

 

 Amodiozko poema guti

 moldatzen dizut maitea

 Ez baita errez sendimendua

 hastetik hautemaitea

 Ez eta ere haren erteko

 hitzaren atxemaitea

 Beraz bertsotan bihotzeko den

 auhen hori emaitea...

 

 Maitasuna da mugarik gabe

 sekulan ez du azkenik

 Suaz erretzen zaitu barnetik

 ez dagoke larrazkenik

 Ez nuen uste bihotz loturak

 hain azkarrak zitazkenik

 Eta maitea zuretzat egun

 bertsoak in nitzazkenik...

 

 Haizeak zion hego hatsean

 zetorrela maitasuna

 Bide beretik hari doakon

 Binaren askatasuna

 Zure ondoan ibiliko naiz

 hilen dut bakartasuna

 Hautsiko baita kateak lotzen

 didan bihotz ontasuna!

 

 Lehen harria, lur aberatsa

 nakarren beti ahoan

 Hura gordea ekai bezala

 edertiaren osoan

 Behin poeta oraindik ero

 esperantzaren gozoan

 Maitea zaude luzaz agian

 bizirik nere gogoan...

 

 Ni maitatzale beroa naizu

 ari naizela bertsutan

 Arin senditzen gara guziak

 bide dorpean batzutan

 Bainan ordea gaur egun hemen

 aspaldi nagola sutan

 Esango nuke eta dut uste

 fidantza banuke zutan...

 

 Orain uzten dut hor hedatzera

 amodiozko uhaina

 Gorde nahi du auhen kantua

 lur estali baten haina

 Orain uzten dut haren kemena

 itotzera nere zaina

 Bihotz indarrak azken finean

 betiko har dezan gaina!

 

 Begiratua zerugainetik

 maitasunaren samurrez

 Bertso hok ditut eman bakarrik

 zuri hitz egin beldurrez

 Mendiak dira negu minean

 denak zuritzen elurrez

 Agian ez da nere begia

 zugatik beteko urez...

 


inprimatu