Alkhat adixkideari
Bidart, Sauveur
1
Duela hogoi ta hamar urte sortu bainintzan Iholdin
Geroztik han berean dut egin adixkide on bat berdin
Hala beharra Kaliforniak gaitu gu bi parte egin
Bainan elgar aditzeak dauku emaiten segur atsegin.
2
Ilabete huntan ditut orai hemen hamar urte bete
Kanpoz alegera in ninduzun, barnetikan berriz trixte
Sos egiteko ideiarekin eta itzultzeko fite
Moltsa ez dut oraino betea, bainan nago beti gazte.
3
Hunara jiteko sendi nuen geroaren arrangura
Zangoak hemen izanik ere gogoa hor dut ardura
Bainan zaildua nago oraindik ez nindaike aisa lerra
Zuen zerbitzuko hemen nago, duzuelarik beharra.
4
Azkeneko berrietan zinen nitaz arranguratua
Hemen kokatzeko nuen ote alde bat xede hartua
Jakin zazu nerekin ez dela aisa egina tratua
Urteek ez bainute batere barnetik kanbiatua.
5
Eskutatu duzula zuk zonbait buru arin edo erro
Hemen ezkontzeko ez nindaike oraino ni aisa bero
Nahiago dut sofritu-eta dolutan ez egon gero
Horrarat itzultzekotan aisa behar baitut izan libro.
6
Ez dautzut gordeko ezkontzeko badutala nik amentsa
Eta hortaratzeko ez nuzu apentziaik ere lotsa
Segur naiz noizbait izanen dela nunbaitik norbait urosa
Sendimendu hoberenaz baita betea ene bihotza.
7
Ez dut uste nehor ere baden hemen laketu osorik
Ameriketan ere ez baita ostiral gabe asterik
Drago bat lagunekin edanez orroitzen gira trixterik
Herria maitatzen ez duenak ez du nihundik bihotzik.
8
Luzara gabe nahi dut orai horrarat berriz etorri
Anartean goraintzi urrundik ene maite aitameri
Anai-arreba, kusi, herritar, adixkide guzieri
Hor izanen naiz pimaderako beztitzeko Besta-Berri.
9
Azkenik zaude zu beti Ernest, erne ta azkar herrian
Injustiziak ez dezan nehor betikotz sar miserian
Eta gazteak elgar aditu, egoiteko hor berian
Euskaldunentzat ez baita nehun bette leku bat lurrian.
