Extaiak bizikletan
Berho, J.
1
Nor ez da hemen ohartu oraiko janizari?
Usaia xahar guziak zaizku aldatzen ari.
Jendea nahi dukete harritua ezarri,
Eztaietan aldi bakotx sakatuz zerbait berri.
2
Nunbait izan berria niz ezteia batzuetan,
ikusiak ikusirik ez bainiz urrikitan...
Eztailiarrak airoski bana bizikletetan,
Frantziako itzulia imitatuz denetan
3
Herriko jendea hor zen bide-bazterretik so,
Jaun-andre esposen beha, kurios alaintso...
Erreklama aurdikitzen ari ziren lau atso,
«Hoparlurekin» kantari moltzo bat besoz-beso.
4
Paper batzu salgei ziren hiruzpalau sosetan,
Lasterkarien izenak ezarririk heletan;
Heien lumeroak ere, ezagut-beharretan.
Hek pasatzeko orena emana zen nunbait-han.
5
Eguerdi abantzu baitzen eta deus ez ageri,
Ni kexu bainan norbaitek argi egin daut niri
«Kontra dukete aizea, buhaka sudurrari!
«Nun ez den esposa kolpez «degonflaturik» jarri...
6
Bet-betan bihurgunean, ezpata gora-gora,
Herriko mutila oihuz: «Hor dira, bai hor dira!»
Jendea esku-zartaka, tira ahala tira,
Esposari orro handiz: «Emak hor, Jean azkarra».
7
Jean horrek, egin erran, anderea besotik
Bazuen mereximendu, herrestan zaukalarik.
Emazte gaixoa, zaia gatean maiz loturik,
Dena izerdi heldu zen, gorri-beltza eginik,
8
Beranduak gero heldu zaharrak lau minutez,
Nahiz oraino polliki zabiltzan gure ustez.
Bainan aita-ginarreba urtua zen ahalgez,
Jean-en amak garraiturik doi-doia bulhar batez.
9
Eliza-bortan bazela gaitzeko jendeketa,
Ateratzen ikusteko andanaren potreta!
Gero bakotxen lepotik eman-eta museta,
Gomit guziak joan ziren, harturik bizikleta.
10
Birazka bidetan gaindi bazabiltzan goxoki,
Musetatik ahoratuz edari eta jaki!
Bufet-etan ez bezala denek izanez alki,
Lekuz, airez, nehun ere ez zitazken hobeki.
11
Ezkont-berriak ez ziren batere gaizkiago,
Errodaz-erroda joanak bi-biak etxerako,
Orantziako itzulia ondoan egiteko...
Hameka mila zorion ezkont-berriendako!