|
Artzain zaharra seme hiritartuaz auhenka
1
Jainko Jauna, zenbat aldiz
etzait ilhundu bihotza!
Ilhundu eta zauritu,
ikusirik zorigaitza!
2
Aita ere ikusi dut
ahultzen eta chahartzen,
Hil-mihisea bezala
egunez egun churitzen!
3
Aita hantchet ikusi dut
supazter choko batean,
Bakarrik, oihu-nigarrez,
-ichildu zen ni jitean...
4
Erraiten zuen: ŤOndikoz,
oi nere ardi churiak!
Zikiro eder, bai eta
nere gaicho achuriak,
5
Oro beharko zituztet
utzi nausi berri bati,
Ezpainiz igan ahalko
mendi hoitarat engoiti!
6
Eztitut ja iraganen
berro, ziloak, jauzian,
Makila firurikatuz
lehen bezala lorian...
7
Iratzez ez dut eginen
maldetan gau-etcholarik.
Ez eta erabiliko
chilintcha ez chirularik.
8
Nihaurek deitzi esneaz
eztut kaikurik betheko,
Nihaurek egin gasnarik
gaurgero ez dut salduko
9
Erhiak gogortu zaizkit:
laneko ez ditut kara
Zangoak ere doazkit
ihintzean lerra-lerra...
10
Oihanburuko kaskora
doi-doia heldu bainintzen,
Bi urthe hautan, gaicho ni,
bide horrek nu lehertzen
11
Gero eta nekezago
dakarzkit eskalapoinak
Halaber uritakoa,
jatekoak eta denak...
Maiz hats-bahitua nago
patarra ezin iganez
Oraino pindar izpi bat
gogoan banu... bainan ez!
12
Hirian, urrun, galdurik,
dabilan nere haur hura
Bil uste ukan dut luzaz,
nere ordaintzat, etchera.
13
Bai herrestan nindabilan,
bainan bihotza gorarik
Battitta ni bainoago
nukeiela amesturik...
14
Amesturik eskualdeko
etchetarik azkarrena
Zitezkela malda huntan,
hainitzez ere, harena!
15
Haren artalde gizena
baino aberatsagorik
Nehork etzukela nihoiz
bazter hautan ikusirik...
16
Anartean errientak
ene Battitta ebatsi,
Buru bihotzak hitz hutsez
bethikotz arras nahasi
17
Egia zuten zaharrek:
eskolarat igortea
Da langile tzar, seme tzar,
eskualdun tzar egitea!
18
Ongi nahi duenari
jakitea aski zaio
Ogi erain eta joiten
eta kondatzen lauraino!
19
Horra zer hitz etsikorrak
entzun ditudan kanpotik.
-Aita gaichoa, dolu dut,
barka zadazu ja goitik!
20
Bainan ez dea beranchko
itzultzeko artzaingora?
Ibaia ezin daiteke
itzul ithurrietara!
|
