Zure desidiaren kaian

ene arimaren kontainerra

utzia dizut

aspaldi kadukaturiko

ilusioz beterik

utzia zaitut.

Agur orain, maitea,

badoa nere baforea...

Zure bihotz-zapia airean

kresala malkoz zipriztinduaz

ikusten zaitut

amestutako zoriona

begitan itorik

ikusten dizut.

Agur berriz, maitea,

badoa nere baforea...

Itsaso zabal mugagabean

inoiz amestu ez den altxorra

topako dizut

egun ahazturen batetan

kai hontan berriro

topako zaitut.

Agur, beraz, maitea,

badoa nere baforea.. .

© Joxerra Garzia