Agur t'erdi, Orson, ilunpetako
hire lagun zaharren izenean
zer moduz bizi haiz azken filmean
ba al da hor lekurik guretzako?
Joan hintzen ezin eginik bertako
gauerdiko kanpaien din-denean
denetan fartsarik handienean
maskara izan nahirik sekulako.
Ez haiz inoiz jainko bilakatuko.
Gezurrezko gezurtien artean
ez duk hire egia aitortuko.
Izan hadi hildakoen bakean
hirugarren gizonaren lekuko
hiritarra ezaren ziutatean.
© Joxerra Garzia "Joxerra Garzia: Dena dela (Bezperaren kronika)" orrialde nagusia