Kale nagusiaren amaieran, San Sebastian zeharkatuaren azpian, kalegurutzean, ertzari buelta ematen lagundu nahiz bezala, arratsalde ordugabetuan. Kitarra eta sonbrerua. Bizar beltza kantari.

                                            ...aita mozkorra dut

                                                ama alargun.

                                                Izan ez ditudan

                                                seme-alabak

                                                jaio orduko umezurtz...

 

Bateri-hotsa bailitzan, handik-pasatzailerik errukitsuenek, lotsatienek eta progreenek, distantzia zuhur, itxuraz indiferenteki kalkulatu batetatik, egunero bi aldiz gutxienez egin behar izaten duen kitarra-erditzeen kausaz ajatu eta zaharkiturik ageri den kitarrazorrora botatzen dituzten txanponen txin-txin hots triste metalikoa.

 

                                            ...bizia maitatzen ez,

                                                heriotzari gorroto,

                                                ai, nigatik izan balitz,

                                                nintzan inoiz jaioko!...

 

Tristura metalikoaren ertzean, erlojupeko San Sebastian geziztatuak, zur eta harri, denboragabetasunaren kontrapuntu tristeagoa marmariatzen du errepikan.

                                            ...ai, une galduen dolua.

                                                ai, une galduen zitala...

 

 

 

© Joxerra Garzia

 

 

"Joxerra Garzia: Dena dela (Bezperaren kronika)" orrialde nagusia