Mai 30 02

Gabriel Arestiren lau poema bere ahotsez

Gabriel Aresti 1975eko ekainaren 5ean (igandez) hil zen Bilbon. Gabriel Arestiren heriotzaren 27. urteurrenaren karietara, poetak berak errezitatutako lau poema eskaintzen dizkizugu: Egia bat esateagatik eta Nire aitaren etxea (“Harri eta herri” liburuan argitaratu zituenak 1964an) eta Gizonaren ahoa eta Azken euskaldunaren heriotzea (“Euskal Harria” liburuan 1967an argitaratu nahi izandakoak, baina zentsuratu egin zizkiotelako beranduago inprimatuak). Gabriel Arestik errezitatutako lau poema hauek bere bi hitzalditatik jasoak dira. Lehen bi poemak 1964ko irailaren 19an Donostiako Udal Liburutegian izandako “Lengo eta oraingo euskal poesia erritarra” hitzaldian Patxi Mujikak grabatuak. Eta ondoko biak 1966an Hernaniko udaletxeko biltzar aretoan izandako “Euskeraren izen poetikoak” hitzaldian Jesus Mari Olanok grabatuak. Susa literatura argitaletxeak Gabriel Arestiren obra osoa argitaratu zuen 1986an hamar liburuko bilduman.

Mai 30 02

Klasikoen liburutegia sarean da

Pentsamenduaren klasikoak izenarekin 70 obra euskarara itzuliak agertu zaizkigu azken urteotan; 1991n hasi eta 2006 urtea bitartean 100 lan izango ditu euskaratuak Klasikoak egitasmoak. Orain Pentsamenduaren Klasikoak gunean obra guzti horiek osorik irakurtzeko modua daukagu, Interneten liburutegia sortuz munduko pentsalarien obrak izango baititugu. Epe laburrean gainera, Jung, Schumpeter, Pierce, Chomsky, San Agustin, Hegel, Bergson, James eta Popperen liburuak argitaratuko dituzte. Edizio berezi eta zaindu hauek lantzeko 40 itzultzailek eta 36 aholku-emailek osatzen duten lantaldea eratu zuten.

Mai 30 02

Pablo Sastreren Leuropa

Pablo Sastrek bere seigarren nobela Leuropa aurkeztu zuen maiatzaren 23an Donostian, Juan Luis Zabalak lagundurik. Andoaingo bi gaztek Marokora egiten duten bidaldia kontatzen du, handik jendea kamioi batean gorderik ekartzeko joanak. “Errealitatea gogorra, gordina, zakarra, dramatikoa eta tragikoa den arren” adierazi zuen Juan Luis Zabalak, “egiari ihes egin gabe baina alferrikako espanturik gabe eta paternalismorik gabe kontatzen du (…) Tximi da narratzailea, inozentea, motz samarra; bere begirada horretan dago nobelaren gakoa“. Pablo Sastrek aitortu zuen: “minik ez balitz bezala saiatu naiz errelitate horri heltzen“. Interneten irakurgai dauzkazu Leuropa nobelaren hasierako pasarte batzuk.

Mai 30 02

Literatur kritika eztaidagai Komatxo artean

“Komatxo artean” Herri Irratiko literatur saioan mahaingurua izango da maiatzaren 29an (asteazkena) 23:00etan. “Literatur kritika” da eztabaidarako gaia. Felipe Juaristi, Jon Kortazar eta Mari Jose Olaziregi dira solaskide gonbitatuak. Saioaren gidaria: Mikel Asurmendi. Literatur irratsaio honek hasitako ziklo berriaren baitan burutzeko lehenengoa da mahainguru hau. Eztabaida saioak hilero izango dira azken azteazkenean. Komatxo artean: Donostia, Loiola eta Gasteizko Herri Irratian.

Mai 23 02

Lutxo Egiaren Paperezko hegazkinak

Lutxo Egiak bere bigarren liburua baina lehenengo nobela aurkeztu zuen maiatzaren 16an, Donostian goizez, arratsaldez Bilboko Kalderapekon adiskide eta idazle askoren aurrean, eta nobelarentzat izenburua oparitu zion Eneko Erranzek kitarraren doinuz lagunduta. Orain Internet bitartez Paperezko hegazkinak nobela osorik irakurtzeko aukera ere baduzu, Josu Landaren Odolbildua bezalaxe.

Mai 23 02

Martzelino Soroa omenduko dute Deban

Aretoko euskal antzerkiaren aitzindari izan zen Martzelino Soroaren omenez, Debako Goaz taldeak hamaseigarren Antzerki Astea antolatu du. Patri Urkizuk Martzelino Soroa idazle eta antzerkilariaz hitzaldia egingo du maiatzaren 24an (ostirala) 20:00etan Debako Kultur Etxean. Ondoko zortzi egunetan hamar ekitaldi eskainiko dituzte. Helduen antzerkian parte hartuko duten talde guztiak amateurrak izango dira. Uztailaren 20an beteko da Soroaren heriotzaren mendeurrena.

Mai 16 02

Sarrionandiak itzulitako Poemas náufragos

Maiatzaren 17an (ostirala) izango da Galizerazko Letren Eguna. Joseba Sarrionandiak Poemas náufragos (Galegoz heldutako poemak) liburua kaleratu zuen Susa-Amerika aldizkariarekin batera 1991ko maiatzean Día das Letras Galegas egunaren karietara.Manoel Antonio, Luis Amado Carballo, Alvaro Cunqueiro, Aquilino Iglesia Alvariño, Luis Pimentel, Luis Seoane, Celso Emilio Ferreiro eta Manuel María poeten lanak itzuli zituen Sarrionandiak. Guztira 18 poema (74 orrialde). Edizioaren apailatzaileak: Xose Estevez eta Iñigo Aranbarri. Liburuaren hitzaurrea: Koldo Izagirre. Orain Interneten lehenengoz aurkezten ditugu poema hauek elebitan Galizierazko Letren Egunaren karietara berriro.

Mai 16 02

Castelaoren lau liburu

Alfonso Daniel Rodriguez Castelao dugu literatura galegoko maisuetako bat. Nahikoa da horretaz ohartzeko bere izena daraman Castelao museoan bisita egin edota bere biografia eta bibliografia irakurtzea. Euskaraz ere baditugu Castelaoren lan batzuk. Susak lau liburu argitaratu zituen 1986an:: Zirtzilak – Kristalezko begiak Koldo Izagirrek euskaratua, Gauzak eta Betiko biak Ramon Etxezarretak itzuliak eta Beti Galizan Bego Montoriok. Koldo Mitxelenako kulturunearen webgunean ipuin bat ere topatu dugu, Koldo Izagirrek jardunaldi batzuetarako apailaturiko edizioaz.

Mai 16 02

Literatura galegoa aldizkarietan

Literatura galegoak zaletu asko ditu gurean, eta Literatur Aldizkarien Gordailuan zenbait testu irakur ditzakezu. Pott aldizkarian Mendez Ferrinen Roi Sordo poema (1978ko azaroan). Susan Militantearean amets urdinak ipuina (Mendez Ferrin / Bego Montorio). Ttu ttua aldizkarian Historia do rock and roll (Anton Reixa / Joanes Urkixo). Anton Reixa berari elkarrizketa luzea egin zion Susak 1990eko uztailean. Celso Emilio Ferreiroren poemak Korrok eta Kandelan; Korrok aldizkarian Harrizko gau luzea eta Kandelan Neno orfo con cabalos ao fondo eta Credo Jon Iñaki Lasak euskaratuak.

Mai 16 02

Idazle galegoak eta literatura unibertsala

Galiziako literaturak leku handia hartu du Interneten. Besteak beste, literatura unibertsaletik galizierara itzulitako obra asko osorik irakur daitezke. Galegoz literatura unibertsala delako gunea eredugarria da. Gomendagarria da halaber Galiziako liburutegi birtuala idazle galegoekin eta beren bibliografiarekin. Modu berean kultura galegoak badu webgunea, literaturari tarte zabala eskaintzen diona.

Mai 09 02

Josu Landak Odolbildua aurkeztu du

Odolbildua nobela aurkeztu zuen Josu Landak maiatzaren 2an Donostian eta Bilbon. Donostiako agerraldian Josu Landarekin batera Igela argitaletxeko Xabier Olarra eta Susako Mikel Elortza aritu ziren. Xabier Olarrak liburuaren aurkezpena egin zuen, Elortzak egilearena. Josu Landak hitz gozoak izan zituen Igelarentzat, izan ere bere nobela idatzi bitartean Igelako “12 bat liburu edo irakurri” zituela aipatu baitzuen. Nobela beltza edo pertsonaia nobela artean kokatu zuen egileak bere lana. Orain liburua, liburudendetan salgai ez ezik, Interneten ere osorik dago irakurgai.

Mai 09 02

Paperezko hegazkinak Lutxo Egiaren lehen nobela

Datorren maiatzaren 16an (osteguna) Lutxo Egiak Paperezko hegazkinak nobela aurkeztuko du Donostian eta Bilbon. 1997an Londresen kokatutako istorioa da Egiarena, baina 1937ko Gernika ere badu oroimenean. Bonbardatutako Gernikara abiatutako kazetari baten iloba ezagutuko du Galder protagonistak. Hiri lainotsu bat baino gehiago, oroimen iturria da Lutxo Egiaren nobelako Londres. Susa argitaletxeak aurkezten duen liburu hau Lutxo Egiaren bigarren liburua da, aurretik Pamiela argitaletxearekin poesiazko “Kalezuloko animalien itzalak” kaleratu zuen. Aurrerapen gisa Interneten dituzu Paperezko hegazkinak liburuko hiru kapitulu.

Mai 09 02

Literatura Astea Gasteizko gaztetxean

Aurten ere Literatura Astea antolatu du Gasteizko gazte asanbladak. Maiatzaren 14tik (asteartea) 19ra (igandea) bitartean, egunero hitzaldi, errezitaldi eta saioak izango dira Gasteizko gaztetxean. Maiatzaren 14an (asteartea) Aitzpea Azkorbebeitiak “Sarrionandiaren irakurketa proposamena” egingo du. Maiatzaren 15ean ipuin kontalari bat izango da. Maitzaren 16an (osteguna) Bihotz Bakartien Klubak poesia errezitaldia egingo du musikaz lagundurik eta maiatzaren 17an (ostirala) preso ohiek Gasteizera plataformak antolatutako literatur lehiaketako testuak irakurriko dituzte. Maiatzaren 19an (igandea) Txusma antzerki taldeak narrazio batzuk antzeztuko ditu, tartean poesia sonoroa eta ipuin erotikoak.

Mai 09 02

Literatura jardunaldiak Iruñean

Iruñeko Erraldoien txokoan euskal literaturari buruzko jardunaldiak antolatu dituzte maiatzaren 13tik (astelehena) 16ra (osteguna) eta hitzaldi guztiak 20:00etan izango dira. Mari Jose Olaziregik “Euskal literatur sistema milurteko berriaren atarian” hitzaldia eskainiko du maiatzaren 13an (astelehena). Itzulpena eta ikerketa euskal literaturan izango da maiatzaren 14ko (asteartea) gai nagusia: Koldo Bigurik “Euskal literatur itzulpena” jorratuko du eta Asun Aierbe Mendizabalek “Literatur ikasketak eta ikerketak gure artean”. Maiatzaren 15ean (asteazkena) euskal literaturaren gaurko paisaia hartuko dute gaitzat. Tere Irastortzak “Euskal poeta irakurleen bila” izango du hizpide, Iban Zalduak “Euskal narratiba 1990, nobelaren hamarkada?”, Aingeru Epaltzak “Euskal literaturaren harrigarria Nafarroan”. Maiatzaren 16rako (osteguna) hautatutako gaia literatur mediazioa da: edizioa eta kritika euskal literaturan; Jorge Gimenez “Editoreen lana euskal literaturan. Literaturaren harrera” gaiaz mintzatuko da, Ana Urkizak “Kritika literarioa euskal literaturan” izango du hizpide.

Mai 01 02

Mikelazulo elkartearen Poesia Astea

Oreretako Mikelazulo elkarteak Poesia Astea antolatu du maiatzeko hirugarren asterako. Igor Estankonaren errezitala izango da maiatzaren 15ean (asteazkena) 20:00etan Oreretako Zumardian. Miren Agur Meabe maiatzaren 16an (osteguna) 20:00etan Mikelazulo Elkartean. Kirmen Uribe maiatzaren 17an (ostirala) 22:00etan Mikela Zubian. Eta “Gu-lau: poesia ikuskizuna” maiatzaren 18an (larunbata) 22:00etan Niessengo plazan. Bestalde, Mikelazulokoek hilero (azken ostegunean) emanaldi bereziak egingo dituzte poema idatzi berriekin. Herriko hainbat lekutan posta-kutxak paratu dituzte, nornahik bere lanak utz ditzan, errezitaldietan irakurriak izateko.

Agenda

Efemerideak

Kritikak