EGUZKI, ARGI LAGUNTZAILLIA
Eguzki, argi gozo biguna
bazatoz neure leiora,
nagi bagarik goizian goiztik
egun onak emotera,
pozez beterik jarten nozula
zeu ikusiaz batera;
eskarrik asko eta egun on,
etorri zaitez aurrera!
Gau illunari bultz eraginda
bazatoz, argi gozoa,
egunsentiko zure dizdiraz
argitzen neure txokoa;
mendi ta zelai, uri, baserri,
errekak eta itxasoa,
argi gozotan jarten dozula
pozez gizadi osoa.
Gau illunian itunik ziran
zugazti, baso, zelaiak,
aurpegi alaiz irri-barreka
jarri dauz zure argiak;
eta pozezko abestietan
txiroliroka txoriak,
Ongi etorri, argi gozoa!»
diñoelarik guztiak.
Ludi ontako izaki danak
zuk alikatzen dituzu,
laño illunez estalduriko
ortze oztiña argitu;
lurbira danai bizitza emon,
itxas-orruak baretu,
gogo itunak poztuta jarri
eta gaxoak osatu.
Argi eder oi, guri laguntzen
etzara iñoiz aspertzen,
goizian goiztik irri-barreka
pozkiro zara agertzen;
gizarte onek ez dautzun arren
eskar aundirik eskeintzen,
argi gozo oi, apal-apalki
beti zatoz zu laguntzen.
Gaurko munduan apaltasuna
ia dakusta galdurik,
alkar-maitasun zoriontsua
gorroto-soiñez jantzirik;
eguzkiaren argia bage
ezek ez daun lez bizirik,
alkar-maitasun barik be ez dau
munduan iñoiz bakerik.
(Karmengo Amaren Egutegia, 1951)
© Balendin Enbeita
www.susa-literatura.eus