Banco Centraleko erasoaldia

 1

 Beintitres de febreron

 eta handik hona

 eskaintzen ari zaigu

 adarjotze ona;

 otsailean Tejero

 zen gure gizona,

 gaurko antzezlekua

 dugu Bartzelona.

 2

 Herenegun, bihar, gaur,

 atzo edo etzi,

 gizon pilo bat ziren

 bankura iritsi,

 eskuineko behatzaz

 gatiloa eutsi,

 esku guztiak altxa

 eta galtzak jaitsi.

 3

 Kontatzen dakiena

 bertan has dadila;

 hamaika gizon ziren

 auskalo zer bila,

 buruan kaputxa ta

 eskuan fusila,

 suertatzerik zegoen

 makina bat hila.

 4

 Badirudi ez zela

 broma inozoa:

 sirenaz eta guardiaz

 bete zen auzoa

 -inguratzen duten lez

 euliek gozoa-

 alfin jakin zituzten

 nahiak ta plazoa.

 5

 Nahiz ta Tejerori

 iadanik barkatu,

 nahi zituzten hura ta

 beste lau askatu,

 Iberiako abioiak

 lehenbailehen dastatu,

 ta Argentinan izanda

 tangoak dantzatu.

 6

 Komandokoek zuten

 propuesta egina

 bainan berjaso zuten

 guztiz desegina;

 Tejerori ez zitzaion

 laket Argentina

 mariskoa ez da-ta

 hemen bezain fina.

 7

 Barruan zeudenentzat

 oi, kinka larria!

 Ustez horia zena

 praktikan gorria,

 asmatu behar orain

 metodo berria,

 matantza egiteko

 behar da zerria.

 8

 GEOkoek azkenik

 tiroen beldurrez

 lortu zuten hartzea

 barrua indarrez,

 bainan ez dakigu ez

 ote den, gezurrez

 lehen hori posible

 bazen ere, gaur ez.

 9

 Bakarra hil zen eta

 bi orduz inguru,

 polizia benditak

 lortu du helburu.

 Horrela gertatzeko

 -ia egon seguru-

 komandoak ez zuen

 ez bihotz, ez buru.

 10

 Hainbeste tirorekin

 sartu zait beroa.

 Ezin, ba, luze izan

 bertsoon geroa.

 Esperoan gaudela

 hurrengo eroa

 datorren bitartean,

 gora Tejeroa!