Euskeraren alde
Azpillaga
Euskaltzale bat datorkizue
Danoi aitzen ematera
Gure Euskera maitagarria
Ba-dijuala iltera.
Oraindik zerbait egin diteke
Saiatuz danak batera:
Laster gerade izkuntza gabe
Alegintzen ez ba'gera.
Arrokeriak gaiñez egin du;
Len apal bizi giñanak
Gaur baiño biar altuago nai,
Onek galdu gaitu danak.
Munduan zear bai ots aundia
Euskaldunaren izenak!
Euren buruen jabe ez dira
Lotsaz baztertzen diranak.
Gaur be ba-dira zeinbatxo gizon
Ikastez jantzi osuak,
Naiz injiniru, naiz arkitetu,
Lege-gizon, medikuak,
Euren buruak euskeragandik
Banatu ezindakuak:
Esanaz guri au eman zigun
Zeru-lurren Jaungoikuak.
Euskereakin au gertatzea
Zer gauza negargarria!
Bera dalako euskal izate
Eder danen oiñarria:
Noizbait ez ote degu aseko
Berak daukan egarria?
Euskera gabe edozelako
Lur bat da Euskalerria.
Gure euskera mardula bai da,
Jakintsuen iritzian;
Zenbat azterka egiten duten
Batzen diran bakoitzian!
Beti esaten dabiltza guri
Itzal andiko itzian,
"Ai, euskaldunak, ez dakizue
Zer daukazuen etxian!"
Egin dagigun euskera alde
Guk egin al degun lana;
Bildurrez eta lotsaz ba'gera,
Galdu bear zaigu dana.
Atzerriakin nastua dago
Len bakarrik zegoana,
Ta belar txarrez bete bear du
Lorezko zelai sakona.
Aurrak dituan gurasuari
Au nai dizut nik agindu,
Zeure aur txiki danei euskeraz
Erakusten alegindu;
Auzokoaren txarrik ez esan,
Akats guztiak berdindu:
Ainbeste gerra etzan izango
Lendik au egin ba'gendu.
Zenbat direan euskera galtzen
Ikusi nai lutekenak!
Euskeraz jakin ta erderaz egin
Aurrai aitak eta amak...
Bake nasairik ezin eduki
Kezka ori dadukanak.
Obe sortuko ez balirake
Orrelako euskaldunak.
Gazte guztien gogoangarri
Oraingoz nator eskera:
Anai gera-ta bildu gaitezen
Familiaren bakera.
Ardi galduen modura gabiltz
Batera eta bestera;
Artalde on bat egin ezian,
Galduko zaigu euskera.
Euskeraz egin dezagun bada
Euskalerritan, maitiak,
Aundi ta txiki, zar eta gazte,
Senar eta emaztiak.
Lengo okerra zuzendu daigun,
Ipuiñak dira bestiak.
Gora euskera biotz batekin,
Euskalerriko guztiak.