Txakur "beltxa"
Ayerbe
-1-
Egia esatia
ez da pekatua,
daukat aditua,
txiki-txikia nintzan
garaiko kontua.
Gaur ere ez da egongo
au debekatua,
ez dezala iñork pentsa
dala asmatua,
baizik neure etxean
bertan gertatua.
-2-
Danok gera gu noski
gazteak izanak,
orain ez geranak,
eta nork ez ditu egin
orrelako lanak?
Bein garai bat ezkero
gertatzen geranak,
ez dulako barkatzen
egundo edanak,
ori badaki ondo
proatu duanak.
-3-
Beraz bi gazte ziran
etxetik irtenak,
jakin nai duanak,
tabernara bidea
ondo zekitenak.
Garaiz gera etxean
esaten zutenak,
aurrez artuagatik
asmorik onenak,
deskuiduak izaten
ala dabillenak.
-4-
Berandua dek eta
guazenbak etxera,
beintzat altxatzera,
juateko gauza geran
proa egitera.
Ori ordubietan
gutxi gora-bera,
pauso bat aurrera ta
iru zearrera,
argituko dik zuzen
juaten ez bagera.
-5-
Amar bat miñutuko
bidea guzita,
zuzen ibilita,
motza luze biurtzen
zearka asita.
Jaunak dakin garaian
etxera iritxita,
ordurako komeri
pranko ikusita,
nun billatzen dituzten
ateak itxita.
-6-
Oraintxe galdu gaituk
au dek dezgrazia,
ola gertatzia,
atalaiakin zegok
atea itxia.
Garai ontan uste dit
atea jotzia,
izango dala geure
buruak galtzia,
al-dan lekutik obe
diagu sartzia.
-7-
Txakur «Beltxa» usaika
berriz barrendikan,
naiko lo egiñikan,
sugurra bixtan zula
ate txulotikan.
Ezagutu zituan
aldez aurretikan,
ez bazeukaten ere
betiko antzikan,
itzegitea palta
baitzun bakarrikan.
-8-
Arrazoi daukak eta
nola ez dik emango,
ta lagun egingo,
baiño nundikan sartu
pentsazak lenengo.
Onuzkero ez dituk
danak lo egongo,
ateratzen badiau
zarata geiago,
otsegin bearrikan
ez diau izango.
-9-
Berriketak utzita
seginak atzetik,
ni noan bidetik,
denborik galdu gabe
iñongo aldetik.
Auxe etorri zaidak
burura kolpetik,
austen ez badiagu
lenago kopetik,
sartuko gerala errez
atzeko leiotik.
-10-
Euk naideken lekutik
naibadek juatia,
aski esatia,
ortarako bazeukat
nik borondatia.
Besterik izango dek
ezer egitia,
zer daukagun naibadek
garbi esana,
abildadea baiño
geiago usua.
-11-
Orain ezin gelditu
beldurrez atzean,
umeen antzean,
ez dek ezer egiten
saiatu ezean.
Ikusten dek leioa
dagola urrean,
jartzen bagera bata
besteen gaiñean,
an nunbait izango dik
goikoak parean.
-12-
Orduan gaiñekoak
beardik ariña,
beardik ariña,
bietan txikiña,
gauzak ondo ta azkar
egiten dakiña.
Izatez eu aizela
dek gauza jakiña,
baiño orain jakiten
asiko bagiña,
nork botako otelikek
pixurik aundiña.
-13-
Ez zekiat zer pixu
dakaten kilotan,
esan naita bertan,
beti bezela niok
gaur neure ustetan.
Iretzako geiegi
noski une ontan,
arkitzen aizelako
bearrenen paltan,
intenzio asko ta
indarra pikotan.
-14-
Esan bezela jartzen
asi ziranean,
ia zuzenean,
bat bezela bestea
egon eziñean.
Azpian indar gutxi
karga asko gaiñean
erdi bidera iritxi
ziran geienean,
lur jota gelditzeko
biak azkenean.
-15-
Zergatik ez diagu
egia aitortzen?
alkar engañatzen,
ola ibili gabe
denbora pasatzen.
Bear dan lekuraiño
ez gaituk irixten,
bixtan dagoen gauza
ez al-dek ikusten?
birekin ez gerala
bat ere osatzen.
-16-
Takur «Beltxa» berriro
orain kezkatuta,
ezin ixilduta,
zaunka egiten zuan
berea ori duta.
Jabea berriz jaiki
zaunkak esnatuta,
eta bikote ura
ala billatuta,
etzabiltzate ola
aitak aginduta.
-17-
Etzaiteztela jarri
orain gorri-gorri,
beidatuz alkarri,
nik ere bazekiat
gauza auen berri.
Eskarmentatutzeko
onena dek ori,
gero ibilli gabe
orren lotsagarri,
urrengoan goizago
etxera etorri.
-18-
Sartu ziran orduan
bear dan lekutik,
len irtendakotik,
umill eta serio
jabeen atzetik.
Auxe esan bear det
bukatu aurretik:
iñork, gaizki pentsatu
badu aiengatik
ez dutela alakorik
geio egin geroztik.
|