Senti bezain gordin
Aurre, Jon
Minak jaten nau pipiak zura
kirriskatzen duen eran;
goian zerua, behean lurra
ez dut besterik aukeran.
Gizasemeaz galdetzen badut
zergatik, zer, nola geran
airean dator erantzun hotza
hil kanpaiaren tankeran:
Nola dezaket hilotza senti
Udaberriko bezperan.
Apatxez apatx heltzen badio
mendian ahuntzak haitzari;
gizon bezala lotzen natzaio
sentimentuen hitzari.
Nola daiteke gizona izan
ritmo gabeko dantzari,
hemen nauzue desesperantzan
zoramenaren haltzari:
Errespetoa ustez dagokit
nola gazia gatzari.
Idi gorriak harrian tira
harria harriz besarka;
zezena idi bihurtu zuten
ezin dezaket nik barka.
Hantxe txintxilik ikusten diot
hutsa bere izan marka,
pazientzia galdu duenak
ez du uztarriko arta:
Mirari al da zezen izana
mendekatzea adarka.
Ahuntzak haitz puntan ba du oreka
idiak berriz indarra;
ahuntz eta idi bildu daitezen
neuk joko diet adarra.
Bata sendoa dugun heinean
bestea ostera azkarra
irabazteko burrukatzea
gure aukera bakarra:
Jela guztia ur bihur dadin
ez zaigu falta sugarra.
Zotzean dagon zapoarentzat
heriotz beltzaren miñak;
hankak airean mugitu arren
jarutiko ditu pozoiñak.
Zazpi buruko suge gorriak
faltan bota ditu oiñak
nahiko lituzke zapoak sobra
darabiltzanen berdiñak:
Besterik ziren Zugarramurdin
erre zituzten sorgiñak.
Zoriona dut amets gai beti
baina ezin erdietsi;
eguneroko gurpil ber-berak.
zu bezala nau irentsi.
Nire kontrara ari zarete
ezin dut hori sinetsi,
dena dela ere ez naiz amildu
arrazoiak ez dit etsi:
Zuen munduak ez nau asetzen
zestokadaka goraintzi.