(Bertso berriak gure mixioari jarriak)
Artzaia
1
Milla bederatzi-eun gaņera
Irurogei-ta-bostian,
Mixio eder bat izandu degu
Donamari-ko errian;
Zeru-egunak izan ditugu
Lenengo illabetian,
Lore oroipena gordeko degu
Bizi geraden artean.
2
Bost auzo ditu Donamariak,
Bostak Jaungoiko zaliak:
Ola, Uxrre, Artze, Igurin,
T'Azkarraga-ko jendiak:
Mixiolariak danoi dizkigu
Eman itzaldi argiak,
Benetan zintzo gorde ditzigun
jaungoikoaren Legiak.
3
Su-ta-garretan mixiolari bat
Etorri zaigu, txit ona,
Zubiaga-tar Mikel-Mari du
Jaun maite orrek izena;
Nik nola esan gure artean
Berak egin duen lana?
Zeruko Aitak emango dio
Sari irabazi duena.
4
Argitasunaz burua eta
Goi-maitasunaz biotza,
Bete gaitzazu, Gogo Deun orrek
Dizugu egiten otoitza:
Zu gabe gugan besterik ez da
Illunpe eta izotza,
Zu zera gure pake iturri
Barkapen, indar, bizitza.
5
Ederki asko zabaldu digu
Jaungoikoaren dotriņa,
Bere esanak betetzearren
Egin zagun alegiņa;
Orretarako lagun zaiguzu
Zeruko Ama Birjiņa,
Ill ondoren ikus dezagun
Zeru eder ta bikaņa.
6
Amar egunez eman dizkigu
Amaika itzaldi eder:
Oiek buruan artzen dituna
Ez liteke bizi oker:
Danen aldetik, Aita Zubiaga,
Dizkitzut ematen esker.
Zure laguantzaz garaitu degu
Gure etsai dan Luziper
7
Bere itzaldi goxo, egoki.
Ederrak eta eztiak,
Pena aundia izango gendun
Entzunik gabe uztiak!
Orretarako entzun diogu,
Nola xar ala gaztiak,
"Ondo gaude emen", Pedrok bezela,
Esaten gendun guztiak.
8
Argi ta garbi esan dizkigu
Gure sinismen-egiak;
Nola eriotz ala epaia
Ta ondorengo guztiak:
Gure barruan ongi ausnartuz
Betiko miņ-oņaziak
Malko samiņez bete zaizkigu
Biotz, gogo ta begiak
9
Mixiolariak esaten zigun
Itzaldi eder batian:
"Egi au ere sartu dezagun
Ondo biotz-barrenian"!
Kristau zintzoak Zeruan beti,
Gaixtoak an, su-leizian
Egongo dira, baņan ez berdiņ,
BETIKOTASUN guzian.
10
Beso-zabalik gure zai dago
BETIKOTASUN AUNDIA,
Ez de berdiņa Zerura igo
Edo inpernura jextia;
Beti gurekiņ eraman zagun
Donetzalle dan Grazia,
Zeruko Aitak idikitzeko
Pozez! Zeruko Atea.
11
Pekatua da animarentzat
Etsai amorratuena,
Zeruko bide eder ortatik
Atera nai gaituena;
"Erne egon ta otoitz beroa"
Beti egiten duena
Burruka ontan aterako da
Nagusi ta txapelduna.
12
Zer giņaden gu Jesus Zerutik
Lurrera jetxi ez ba-litz?
Egongo giņan: ez mixiolari,
Ez apez, ez eliz:
Mundu ontako illunpe beltzak
Berak bete ditu argiz;
Bera guretzat, aiņ ona izan-ta
gu berarentzat, aiņ murritz!
13
Jesukristogan Fede bizi bat
Izan bear du gizonak,
Bera ikusi, Berari entzun.
Ta jarraitzeko asmoak
Berak bezala barkatu eta
Maitatu lagun-urkoak;
Orrela danak dute esango
Kristau gerala guztiak.
14
Mundu onetan egiten dira
Egun samiņak agertu;
Ordu oietan bata besteai
Bear diogu lagundu:
Gure artean anaitasunak
Egin bear du agindu;
Orrela bizi kristau gerala
Egingo degu aitortu
15
Animen aldez egin duena
Bertsoz ez dago neurtzerik,
Izlari onak izan litezke,
Baņan, nun dago oberik?
Guraso, ume, neska, mutillak
Banazka, goxo, arturik,
Zeruratzeko egin bearrak
Ez dauzakgu aztutzerik.
16
Illen aldeko itzaldia ta
Meza ederra kantuan,
Alaxen degu Mixio Santua
Bukatu azken orduan:
Alkar lagunduz, gaur eta beti
Bizi gaitezen munduan,
Zorion betez egon gaitezen
Ill ondorean Zeruan.
17
AITA ZUBIAGA-ri:
Nekeak ez du zugan sarrerik,
Lanerako beti prestu;
Zebaterano sayatu zeran
Eziņ liteke sinistu!
Maite-damuak gure barruan
Zuk dizkigutzu, bai, sortu;
Beti betiko pekatu ori
Oinpean dezagun artu
18
Aurtxo guzien maixu jatorra
Zu dotriņ eta kantuan,
Konpesioko lanetan, berriz,
Ordu txarrik etzeguan;
Amaika otoitz egin dituzu
Gure Jaunaren aurrean!
Gaur eta beti Donamaria-k
Izango zaitu goguan.
19
Bazoaz oraiņ gure artetik
Lan asko egiņ ondoan,
Millaka esker! t'ematen dizut
Musu bero bat eskuan;
Baldiņ geiago ez ba-zaitugu
Emen ikusten munduan,
Jaungoiko Onak artu gaitzala
Danok Betiko Zeruan.
20
Artu gaitzatzu, Zeruko Ama,
Eman zaiguzu eskua,
Biotz-biotzez eskatzen dizut
Guziontzako Zerua;
Zeru goietan bildu gaitezen
Beko pamili osua;
Otoitz onekiņ bukatutzen det
Nere azkeneko bertsua
