Lezorako promesa
Artola, R.
Alza-ko andre batek
zuben bein promesa,
Lezo-ra joatekoa
entzutera meza.
Eta zijoazela
gizona ta biyak,
bidean arrapatu
zituben euriyak.
Bada ain gogor golpez
zitzaioten asi,
andreak segiduban,
kamisa ta guzi
gona guztiyak jaso
zituben burura,
eta ala pasatu
zuten bide ura.
Pasaiako parean
ziranean jira,
parrez ikusi zuten
jendea begira,
eta Errenteriyan
ziranean sartu,
oraindik par geiago
zuten an nabaitu.
Chistuka ta burlaka
baiziyen eraso,
zeñen andre gajoak
arriturik oso,
gizonari galdetu
ziyon nairik jakin:
-¿Zer pasatzen da emen?
¿zer da gaur gurekin?
-¡Zer pasako da emen!
zuri ipurdiya
ageri zaizu, eta
ori da guztiya.
-Jesus, Jesus, botiaz
gonak burutikan,
esan ziyon: ¿Zergatik
ez nazu len esan?
-Nik uste nuben zala
egiña promesa,
orrela joatekoa
entzutera meza.
|