J.Oleari
Arteaga, Iñaki (Zazpi)
1
Zital burrukan asi ezkero
emen ez dago gauz onik.
Eta gañera kontrarioak
ez bai daukate eskolik.
Juxtu-juxtuan dakizu leitzen
eskribitzean komerik.
Nola arraio zabiltz aitatzen
latiñ eta teolojik?
2
Arrokerian itz egin dezu
iduki zazu arreta.
Irakurleak parre zarataz
zure lepoz dabiltz eta.
«Zure izena jartzen dezula
agirian idatzita»
Aberastasun aundia etzan
idukitzeko gordeta.
3
Idi proa ta ari apustuk
nai badituzu aitatu,
ortik aurrera zure indarrak
obekiago probatu.
eio dakiñen erakutsia
zergatikan ez onartu?
Entenditzeko gauze etzeran
arrazoietan ez sartu.
4
«Brometan ere itz egiteak»
ez dakar neretzat kalte.
Ofizio ortan ibiltzen bai naiz
igande jai eta aste.
Kupira gabe zigortu dezu
senar emazten alkarte.
Legazpi ortan nunbait akerrai
paotxa jorra diote.
5
Arrokeria inorantzia
beti izan dira anai.
Erretxindurik bizi zera ta
bestiei kulpa eman nai.
Nere partetik esaten dizut
egon zaitezela lasai,
sarri barkatu izan oi diot
zer ari dan ez dakiñai.
6
«Mutil zar asko jeixten dirala
aberearen gradura».
Egia edo gezurra izan
etzait batere ardura.
Pentsakizun bat sartu didazu
Olea jauna burura.
Ezkondutako batzuek ere
dabiltz abere modura.
7
«Nai dezunean asiko gera
alkar zigortzen benetan».
Ala diozu sasoi gogorrez
sekulako indarretan.
Ez det denborik iñoiz galdu nai
Olako gauz exkaxetan.
Bañan jarrai nai bazendu kantuz
nik jarraiko det kantetan.
8
Bota didazun kunplimentua
ez nago arras uzteko,
lenago ere ixildu ditut
amaika zure antzeko.
Nork esan dizu teolojian
kokoteraño sartzeko,
obeto zaude zu kalejiran
danbor aundia jotzeko.
9
Nere asmoa izaten oi da
pertsonekiñ kunplitzia
Bestela nola kunpli lezake
gizon batek justizia?
Oso pozgarri iruditu zait
gure arteko auzia,
beti egoki etorri oi da
gizon bat ezagutzia.