1978ko santomasak
Arriola, Joxe Manuel
1
Gauzak pentsatzen jarri gaitezen
gure artean biziro.
Santomas eta Gabonak dira
gerturatuak berriro.
Euskal Erria agertzen zaigu
problematsu ta serio.
Ekaitz zakarra baretu eta
ea jartzen zaigun giro.
2
Santo Tomasez gure azokak
ezagunak asko jentek;
ori orrela dan ezkerotik
onela uste du batek;
argi egiņa len izan dana
ainbat eta ainbat urtek;
aurtengoakin beste bat geio
espero du Arrasatek.
3
Batzuk azoka amets dutenak,
erromeria bestiak;
gizaldietan iraun duana
gaur naikoa lan eustiak;
eragozpenak uxatutzeko
problemaz gaude betiak;
dan dana jator konpontzeko gai
dirala nago gaztiak.
4
Gaitasunean geran aņakin
eman ezik okerrera,
bide luzean nere iritziz
joan gindezke aurrera.
Kristau legeak botatze ezkeroz
apurtuta baztarrera,
bakar bakarrik gaitasun orrek
garamazki negarrera.
5
Santo Tomasen ondoren orain
atzetik datoz gabonak;
berriztutzeko Jesus Aurraren
etorrerako egunak;
gure galtasun berezi oiek
usatzeko guztiz onak;
urte berriak euzkitzen gaitun
len illunetan egunak.
6
Illobi danak ildakoz bete,
senda-etxeak zaurituz;
trixkak ugari bazterretan da
diru etxeak utsituz;
itz baten esan nai nukeana
bizi bideak gutxituz;
orrela gauzak ikusten ditut
gaur gaur bezela begituz.
7
Urte berriak lore apaiņez
jantzi beza gure lurra;
aurrerakoa ez dedin izan
lenago bezin gogorra;
alde batetik edo bestetik
erasoa ta zigorra:
gauzak obera aldatutzea
oso zaigu derrigorra.
8
Bide tristetik jarraitu gabe
berriro nua pestara;
Santo Tomasen egitaraua
ezta oraindik atera;
baņa ba dakit gure gaztiak
ari dirala artara,
itzuli naian garai bateko
Santomas Arrasatera.
9
Txalogarria gure gaztiak
duten asmo borobilla;
Santomas jaiak jatortzea da
beren eginkizun soilla;
zenbateraņo poztutzen naizen
esatea bai zait zailla;
biotz biotzez opa dedana
dana ondo irten dedilla.
10
Bertso batzuek moldatzea zan
gazte auen egarria;
eginkizun aun neregana da
zuzen zuzen eroria;
nik ere berriz nere aldetik
serbitu nai det erria;
ondo igaro urte zar au ta
obeto asi berria.