Abesti kupigarria
Emeterio Arrese
Goibelotz-unez aurten izan dan
illunperik otzenean,
auzoko beste guziak lasai
lotan zeuden bitartean
eresi xamur negargarri au
entzun det bart arratsean.
"Gaitzaren mende
ain kupigarri
zauden semetxo maitea,
gau otza da-ta
mugitu gabe
seaskan egon zaitea."
"Negarrik ez-ba...;
ene biyotxa,
nun daukazu min, zer dezu?
maite-maiteka
zure amatxok
azkar sendatuko zaitu."
"Listor beltzen-bat
oso barrura
sartu zaio Maitiño'ri,
gaxoak orain
zurbildutako
landaretxoa dirudi."
"Ikaraz nago
elur-maindire
gañez datorren aizeak
emen aldizka
banatzen ditu
txakur-añura luzeak."
"¡Otoi,... otoi, Jaun!
Ume laztan au
luzaro ez euki miñez,
bestela nere
biotz gaxoa
lertuko da zorigaitzez..."
"Orain... ¡bai argi!
Zure begitan
piztu da zeru ber-bera;
Maitiño polit
zoragarriya
laister sendatuko zera."
"...Abo xabalik
lotan... ¡ez, ene!,
¡illotz, illotzik Maitiño;
¡il da-ta nere
bizitz argal au
goibeldu beti-betiko!"
Ixildu zan da ez nuan geigo
ezeren txintik nabaitu;
illunde otza goi eta bean,
guziya len bezin mutu...
Gertaldi ori burutik ezin
¡ezin det iñolaz kendu!