Franziskotarren Foruko komentu barriari

Arrese ta Beitia, Felipe

 ¿Zeñek ez daki Eguzki batek

 Zelan dituan argitzen,

 Berak bakarrik zeru ta lurra

 Ziranak illun aurkitzen?

 Ta ¿nok ez daki ak deuskunean

 Begia ozta agertzen,

 Izate danak barrez deutsala

 "Zatorkuz ondo esaten"

 Eta illunak ikuste ez arren

 Deutsala iges egiten?

 ¿Zeñek esan lei ez dala ederra

 Izarraturik gabean,

 Zeru urdiña ainbeste bichiz

 Galanto jazten danean?

 Eurai begira ni ¡zenbat bidar!

 Zurturik gelditutean,

 Kantau gura ta kantau ezinta

 Jarten naz neure artean,

 Ta Egillea adoretako

 Auspaztuten naz lurrean.

 Baña gaur kantau al dot nik

 Kantau bear dot egin nik,

 Zergaitik izar barri bat jakun

 Agertu uste bagarik,

 Neure aingeru kanta zaleak,

 Ez deust emoten bakerik;

 Gau eta egun dagot kiñaka

 Enadin egon muturik,

 Lira barri bat berak deust opa

 Legoa badot zarturik.

 Isiotu deust berak biotza,

 Berak argitu burua,

 Berak ego bi gañera emon

 Eregiteko kantua,

 Berak luzatu baneukan bere

 Laburra pentsamentua;

 Iragarteko bertsoz egogi

 Emen gertau dan kontua,

 Zerren eguzki antzekoa dan

 Izar eder gaur jayua.

 Zorioneko jayotza izan

 Bekizu zuzi barria,

 Bizkayarentzat izan zaitean

 Kurselu garrez bizia,

 Ostarku gisan zuk dirudizu

 Bake erakarlaria,

 Ekach indriska eta urjolen

 Aterri poztugarria,

 Gaurko eguna izan dakigun

 Beti gomutagarria.

 Zolloko acha zugaitik dago

 Ezin geyago poztua,

 Bertan choriak ugari dabe

 Chistu ta chorrochiua;

 Orra Gernika-ibar ederra

 Dana alegeratua,

 Orra bakean otzan isillik,

 Ichaso orroetsua,

 Orra gaur berdez eder jantzirik

 Gure Arbola santua.

 ¡Ze ederra da leku santu au,

 Nun Jaungoikoa dan bizi!

 Alan bart emen amesetan dot

 Eskallera bat ikusi,

 Lurretik eta goi zeruraño

 Luzeran zana jadichi,

 Bertatik ona zoriondunak

 Asko zirean eratsi,

 Euren buruko estalgarriak

 Egite arren erantzi.

 "Itzaltsua da leku santu au"

 Esaten eben dan danak;

 Auts kolorezko abituagaz

 Zirudien bai, anayak,

 Euren artean baziran mitrak,

 Baita kapelo zabalak,

 Baita baziran ekarrezanak

 Aita santuen tiarak,

 ¿Nok kontau daikez martire palmak

 Dotore zituezanak?

 Aiñ eskallera eskergeari

 Nekusan gizon bat baña,

 Eutsiten bere sorbaldeagaz

 Jesusen antza eukana,

 Eta Desusen antzekoena

 Irakurten dot nik dala,

 Asisko seme Franzisko umill

 Munduan bakar bakarra,

 Duda bagarik esan neike nik

 Gizon a berbera zala.

 Eukazalako esku bietan

 Gorririk untze zuluak,

 Oñetan bere odoldun zauri

 Bardin Jesusek lakuak;

 Baña gogoa eroan eustan

 Beraren sayetsekuak,

 Karobi bati legeche nundik

 Urteten eutsan beruak,

 Zerren biotza goritu eutsan

 Kristoren amodiuak.

 Zerutarrezko prozesiñoa

 Nengoan pozik ikusten,

 Eneban uste nik amesetan

 Nintzanik bada aurkitzen;

 Baña amesa a bazan bere

 Zintzo zintzo dot sinisten,

 Leku au dala berarizkua

 Bertanche bizi ditezen,

 Franzisko santu aren semeak

 Eleiseari eutsiten.

 Zergaitik euren Aita zalako

 Eleisearen pillarra,

 Inozenzio irugarrenak

 Lotan ikusi ebana;

 Eta bakigu guraso aren

 Semeak onak dirala,

 Gure mundu au badogu bere

 Leku askodun zabala,

 Danok dakigu dala edo nun

 Fraillen bat Franziskotarra.

 Agurtzen zaitut nik gaur Foruko

 Komentu polit chikia,

 Zarealako uso zurizko

 Espirituen abia;

 Zure umeak artuko dabe

 Egan egiñik Asia,

 Ozeania, Amerika ta

 Baita Afrika goria,

 Ez da zer esan, Europa barriz

 Landuko dabe guztia.

 Eguzkiak nun begia josi,

 An Franziskoren semea,

 Aurkituko da zabalduteko

 Beste argi bat obea,

 Idigiagaz itsu tristeai

 Begietako atea,

 Euren aurrean jarten deutsela.

 Ispillu lauso bagea,

 Ebanjelio eguzki eder

 Zerutarra dan legea.

 ....................

 Lege on orrek zer egin daben

 Danok daukagu goguan,

 Zergaitik laño bagarik jarri

 Ginduzan adimentuan,

 Ipar aiseak garbitasuna

 Egin oi badau zeruan,

 Jesukristoren lege arek ¿zer

 Egingo eban munduan,

 Lengo lege zar anchiñakoaz

 Itsumendian beguan?

 Baña alan bere egiak daukan

 Arerioak lurrean,

 Ipar aiseak egoia zelan

 Euki oi daben aurrean;

 Oneek balebiltz lagunak legea

 Alkar arturik onean,

 Eleuskiguez alan sortuko

 Trumoi gaiztorik aidean,

 Zeñen urjolak gero oi doguz

 Artuten bizkar gañean.

 Errubageok artuten gagoz

 Charren okerra guztia,

 Zeiñtzuk eurenaz asetu ez da

 Nai dabe besten zatia;

 Eurak gaur goyan dagozalako

 Irunsten dabe chikia,

 Ichaso zabal arroak zelan

 Indar gichiko ontzia;

 Baña ez deutse Jaunak ichiko

 Jaristen garaitz nausia.

 Alperrik dabe aise gaiztoa

 Zabaldu mundu guztira,

 Euren ichaso amorratua

 Alperrik zital jarri da;

 Bertan dabillan Arrantzalea

 Zelan daukagun begira,

 Ea Franziskotarrak bertatik

 Erremu bana ingira,

 Aterateko dagoana estu

 Bildurbagako tokira.

 Or Eleisea Aita Franziskok

 Ikusi eban tayuan,

 Dirudiala zabu zabuka

 Galtzeko pelleburuan,

 Odei illuna besterik ez dan

 Bere inguru osuan,

 Ekach gaiztoak arturik dauke

 Euren erraien barruan

 Franziskotarrik ¿ez ete dauka

 Galdu ez dedin onduan?

 Milla aingerua, asko daukaz bai,

 Eta olatu artera

 An nun doazan, egin gurarik

 Arpegiz arpegi gerra;

 Doaz urpean, doaz gañean,

 Mariñel onen antzera,

 Infernutar dan ichasoari

 Arima oztuak kentzera,

 Doaz, bai, doaz, doaz garaitu

 Edo martire illtera.

 Aurrera doaz, leikarraldoa

 Daben legeche eguzkiak,

 Ipini arte ur biurturik

 Biotz izoztu guztiak,

 Burdiña otzak gogorrak dira,

 Beroak argizagiak,

 Karidadezko suaz bigundu

 Egiñik pekatariak,

 Otso ziranak dituezala

 Arditzen sermolariak.

 Iragarririk errelijiño

 Bakarrik katolikuan,

 Salbaziñoa aurkitzen dala,

 Eta ez andik kanpuan,

 Erechi donga guzurrezkoak

 Ekarrezanai buruan

 Ziatz atera, eta egiak

 Sarturik euren lekuan,

 ¡O! zenbat asi diran lanean

 Eleisearen arluan!

 Zenbatek, baña ezaguturik

 Len oker ebiltzazala,

 Konbertidurik esaten dabe

 Gaur beste batzuk dirala;

 Leon agura zarrak koroia

 Erroman bear leukala,

 Biurtu arte berari ori

 Onik izango ez dala,

 Eta mundua baketzeko duiñ

 Bera dogula bakarra.

 Autortzen dabe, lotsa bagarik

 Bera dogula nausia,

 Eta berari zor deutsagula

 Danok obedientzia;

 Bera dogula Artzaiña eta

 Gu bere ardi taldia,

 Berak eta guk konpondu daigun

 Eleisa katolikia,

 Nundik zerura aurkietan dan

 Zuzen zuzen dan bidia.

 Eskallera bat emendik dago

 Elduten dana bertara,

 Baña igoten nekosua da,

 Da pikea, da bedarra,

 Franziskotarren atzetik goazan

 Goruntza mallarik malla,

 Gora bai, gora gogor egiñaz

 Goren gorengo puntara,

 Gozotasunez sartu gaitean

 Goibera bako landara.

 Beiñ ara sartu ezkero ziran

 Amaitu gure nekiak,

 An ez daukagu gerra lekurik,

 Ez da nun egiñ peliak;

 An da bakarrik gozatutea

 Ereñotzezko koroiak,

 Kantaurik beti, beti bai, beti

 Garaitza alegeriak,

 Jaungoikoari eregiagaz

 Gloria azken bagiak.