Mendekantza
Aresti, Gabriel
Elizatzar honetan orain ezpanengo,
elitzaidake inola gogora etorriko
zure oroitzapenik edo geratuko
litzake lore gabe etor zedineko.
Barren edo kanpo,
garratz edo gozo,
eztu pausatuko,
ez oheratuko.
Nire memori onak ezin daidike lo.
Nire negarrak eztio
kontsoluari deituko.
Ene maitea, ene laztana,
zu gaberikan eztago
mundu honetan zori gaiztoan
alaitasunik neutzako.
Etzaitezte, mesedez, orain hainbat pobre.
Zuen bihotz urria aberats zazue.
Letaria hauekin lasai etzaudete.
Haragidun gizona benetan da triste.
Eztauka batere
egiazko fede
edo karitate:
Guztia da atzipe.
Zerura jadisteko esperantzak ere.
Miren eztago presente,
betiko dago ausente.
Zuen otoitzok eta erreguok
egiaz dira debalde.
Urrikalmentu gizon-zalerik
eztut inola nik gorde.
Etzaitezte, pobreok, oraintxe defendi;
nire goikotasuna eztadin ofendi;
dezazuen ederki zer naizen entendi;
dezazuen agintzen dudana obedi;
honera nator ni,
haltu eta haundi,
bortitz eta egoki.
Errezatzen hari
zarate, gero nadin zuetzaz urriki.
Ezer ez eska jaunari!
Biotza daukat hain urri...
Zuekandikar, eznabil-eta
egun honetan ihesi,
nire haizkora, nire arbuioa,
doazkizue hegazi.
Nire hustasunaren barnean, harrika.
heiagoraz, egiten nuen gogoeta;
nolako gastigua zen egokiena
nire borreroari emateko; eta,
ezin nuen pentsa
beste ezin gauza:
Talion izanen da!
Behar dut babesa.
Barnean duten oro nai diet atera.
Han da zuentzat morrontza:
Nire hitzari egonda,
ezin igarri zein den emanen
zaitzuen azken parada.
Enetxo, zuek urrikarriok,
banaukazue prest jada.
Orduan hasi nuen, gogor eta itsu,
nire burrukaldia: Geratzeko kitu.
Beren larruetatik arin nintzen sartu,
eta errai guztiak nizkien altzatu:
Garunea kendu,
hesteak ohostu,
bihotza zabaldu,
giltzurrunak moztu:
Gizonaren bularrak labirintu bat du.
Baina eznintzen ez, galdu:
Gauza guztiak aurkitu
nituen beren leku gertuan,
eta kanpora botatu
nituen denak, erroiek izan
lezaten nundik gizendu.
Arimaren erraiak ebatsi nizkien,
pena litezen denak munduan dolorez
Fede, karitatea, esperantza kentzen
ausartu nintzen nire nekearen ordez.
Badakit kobratzen,
baina dirutan ez.
Deabruak, erren,
egiten du amets:
Errolaren antzean ederki da asetzen
Inork eztaki negarrez
bere garaitza hospatzen.
Gizon etoiak hutsitu ditut
mendekantzaren ohorez.
Hoiek Mireni zioten zorra
icitatu diet ongien.
Burrukaldi haundia gaur irabazi dut,
etsaien harmadurak errez hautsi ditut.
Eta nire nekea ezin diteke neurt.
Eskumako belauna daukat hogei apur.
Egin diot agur
lehen neukan gorputz
osoari. Ta gaur
eztakit jada deus,
ezpada eztaukadala ezein saihets-ezur.
Aginak galdu dira erruz.
Okotza ere bertan utz.
Nire zauriak sendatutzeko
jezarri nintzen atabut
baten gainean, malda gorea
eztadin izan hain biluz.
Begiratu ere nuen gatazka-lekutik,
eta eznuen ikusi batere bilotzik
Ezta egon gizona inoiz hain bizirik:
Ni hil arte ezta egon halako gizonik,
hain bizitzen denik.
Eztute nekerik,
daudelako hutsik.
Merezi nuen nik
eskerrak lizkidaten bihotz-bihotzetik.
Orain eztago itzalik.
Ezta zeruan goibelik.
Beren aurrean ezta kausitz
lehengo behatz-toporik.
Hoek ibili litezke orain
sufritu gabe mundutik.
Nire hezurretako zauritzar sakonok
medikuntza-legean ezin dira konpon.
Materia zikina bertatik zerion.
Adiskide mamia nendukan Derion,
mutiko guztiz on,
hemen balitz egon...
Eznengoke pasmoz
zikindurik inoiz.
Sendatuko balizkit oraingo zauriok...
Falta zaizkidan hezurrok
eztira ikusten lurreon.
Gora begira nire begiak
ikusten dute derrigor,
zer zen jazoko gizon artera
haizkora gabe banentor.
Eta ikusten dute han goian bestia,
lengo gizon beteek hamorruz jarria,
oraingo gizon hutsek bera jaurtikia,
hamiltegi batean azkar eroria,
lepo ebakia,
buru itzulia,
hatzamar gabea,
agin aterea,
antolatzen duela infernu berria.
Ahora dator barrea,
ezpainetara irria.
Errez izan da higuinduaren
harmak lurrera jotea.
Ehortz dezagun bein da betiko
gizasemeen etsaia!
Nire gorputza eta odol berotsua...
Hezur batzuk oraindik... Ezpaitzen naikoa!
Han da gizonakandik dakardan kontua.
Gizateria izan dadin salbatua.
Naizela maisua...
Gauean itsua...
Badator ordua!
Nire erlojua...
Oraindikan aldean baitaukat burua!
Bildots berria, mantsoa;
Jainko bortitza, haltua:
Zuri eskerrak, ordu honetan
dago geugana heldua
joran bizian eduki nahi
genuen salbamentua.