Lur honetan
Aresti, G.
Lur honetan
ehortziko naute.
Elizan aterik
ez dute zabalduko.
Kanpaiek ez dute
otoitzera deituko.
Apaizek ez dute nire
ofiziorik kantatuko.
Eta
lapurren artetik
nire hilotza
ateratzen dutanean,
bazter ilun batera,
bazter aparte batera,
eramanen naute
gauerdian;
bertan,
isilik
manaiatuko dirade,
eskuztatuko dirade,
haitzurrak,
lurrean
hilobi sakon bat
ebaki arte.
Jaurtikiko naute
han barrenean,
zakur bat banintz bezala
hondakin triste hau.
Ez dute gainean
hilarririk landuko;
gurutze triste batekin
ez dute markatuko
betirako
natzan
lekua.
Baina hala eta guztiz ere
lur honetan
ehortziko naute.
Ohoro hau ez didate ukatuko.
Gizonek.
|