Deskantsuaren bitartez
Aresti, Gabriel
Etxean bezala gaude
orain arrokartean.
Adiskideak gara
egintza bakoitzean
Joane eta Miren,
altzipresen artean
usteldu garenean.
Nola diren luze
altzipresak gauean
Hilotz ustelek elkar
maitatzen dutenean,
ezta diferentziarik
hezurrutsen artean
Mila gezur esan zigun
atzo gure maisuak
gizon hilak ezkara
gizon eskolatuak:
ikusten ditugu
beraren liburuak,
nola abere mutuak
Ikusten dituen
goizaldean zemak,
noragino diraden
jaditsiko primuak,
edo artean hildoak
goldeak markatuak.
Gure maisua izan da
esperantza gaiztoa.
Aspalditik da hori
gure amonatxoa;
guztiz eztia da
beti bere ahoa;
baina gizagajoa
oso makal dago,
herbalkeriak joa.
Amonarik eztaukat;
horregatik otsoa
hurbildu zitzaidan niri.
makurturik lepoa.
|