Bideko leloa
Mujika, Luis Mari
Belenera, Belenera,
Maria ta Jose gera.
Bihotzak poztura eta
ezpain gorriak kantu,
aldaparen orraziaz
astotxoa nekatu,
hilargi hitsa gazta bailitz
muino gainean altu
(aih, Joxepe, aih, Maria,
jaiorik al da Jesus?),
limoiaren mami latza
azukre on gertatu,
Joxepe-k -«goazen, goazen arin
Euskal Herritik zalu,
euskaldunak bakearen
ondasuna baitu ahaztu»,
Maria-k -«ez Joxepe, ez Joxepe,
etzazu horren kontu,
Euskal Herrian jadanik
fusilek dute damu»,
zoko batean fusila
herdoilduraz hondatu,
sugearen mihia bihur
haurtxoaren jostailu,
aingeruek eta artzaiek
Euskal Herrian kantu...!
Belenera, Belenera,
Maria ta Jose gera.
|