Zelain aldean

Mujika, Luis M.

 Leiho atzetik beztura

 ta adar bilutsen nahaspil,

 azil negubera hontan

 aldapa-behera nabil,

 (saiatzen naiz udazken hau

 ber-udaberri dadin...).

 azaro etsiezinak

 neguaren eraskin,

 han-hemen mantxa nagiak

 herio-giroz amil,

 Zelain-go bide-sasian

 habi beltzen hondakin

 habia urratuta dago,

 belar-izpitan zarpil,

 linea iheskorren zehar

 oroiek mila asmakin,

 Ipintza aldera bi bele

 garraisiaz ta arin,

 kristal hitsek sugeritzen

 zer senti, zer eragin,

 gelako kristalen barna

 mindura nik emagin...