Gizon kosmikoa
Mujika, Luis Mari
Han zebiltzen ekiten
basurdeen haginak,
han zebiltzen jarduten
asmo zitalen doinu makurrak,
han zorigaitza ta erorbeharra
setaz sumintzen.
Hitz bizkor-geometrikoak
asmoaren gelatan borrokan,
arrubioek seme ernegatuak
erditzen zituzten,
galburuaren mozkor lodiak
burua apaltzen zuen,
ezinaren aurka ekiten zuten,
labe, sabel ta zakilen lehiak
adatsak -dena makal, dena baldan-
arratsari eskaintzen ziren,
mundu bolkantsu, arrazoingabeak
gizonen adimenetik ihes egiten zuen,
ni hilargiki, eguzkiki
gauzetan isladatzen nintzen,
begien sua izarren dardaizoz
nahasten zitzaidan,
ozpin irainduen hitza
astinagoa gertatzen zen
eta itsasoak kristalen irakinean
gizon kosmikoa
legarik gabea,
legerik gabea,
mugarik gabea
experimentatzen zuen...