Eguzkiaren semea nintzen
Mujika, Luis Mari
Eguzkiaren semea nintzen,
eguzki olatuetan biltzen nintzen,
mendiak, asmoak, ibarrak, gogoak
ikara goritan nereganatzen,
eguzkiak mahatsaren ardo irakinaz
gauzak oro egosten...
Garitegiaren kalenturan
kolore gizenak altxatzen ziren,
eguzkiaren sukarrak artaburuen grinan
ezpain basatiak jartzen zituen,
eguzkiaren behatzak
gereziondoen odol-tantak
areagotzen zituen,
eguzkiaren gorrotoak
lurraren egarria
su eta zigor bihurtzen zuen,
eguzkiaren beso fingabeek
itzalaren izena alferrikakoa egiten zuten,
eguzkiaren argitan gauza oro
labe eta arrago gertatzen zen,
ene izadia, ene natura
larriagoa, handiagoa, izanagoa bihurtzen zen,
eguzkiaren erauntsi goritan
gauzen noiz-a, nora eta nongo-a
argiagoa bilakatzen zen
eta poeta honen gogoa eta unea
zutiagoa, altuagoa itzultzen...
Bai, eguzkiaren semea nintzen...