Txalapartak gan-dan-ban
Mujika, Luis Mari
Txalapartak gan-dan-ban,
txalapartak dan-ban-gan,
txalapartak ban-gan-dan...
Herio ta amorea
elkar borroka zaizkit,
arratsak jalgi itagiak
oraindikan zintzilik,
herioa zoro dator
maite-hariak hautsiz,
kosmoak basapizti ta
zezen beltzen erauntsi,
ekaitzen, ozeanoen
otzikarak ilundi,
azkazalen ahaleginak
setatiegi dabiltz,
altxairuen altxagurak
bizkorragotzen antsiz,
ozpin suminduak ere.
deadarka barrendik,
kolpeak, zartakoak ez
leunberatzen oraindik,
herioa ta amorea
elkar borroka zaizkit,
dena errape gizen ta
mahats bilduen lubizi,
izan, izan, izan nahi dut,
bainan ez jasan soilik,
borroka, agonia, lehia
ene hitzen geografi,
jo, hautsi, apurtu behar,
aih, jarraitzeko bizi...!
Txalapartak dan-ban-gan
|