Lur-amak hatsa lodia

Mujika, Luis Mari

 Lur-amak hatsa lodia,

 lurrak hazia goren,

 arto ta gari helduek

 margo makurren plazer

 (gozamen larriagorik,

 esan, dasta al daiteke?),

 uztaren sukar altua

 odol gaiztoen kolpez,

 bai, aleak hausten dabiltz,

 ale gizenak lehertzen,

 esperma tiranikoak

 erauntsitan han-hemen,

 goldearen zakil latzak

 oparia ondoren,

 izadiak erasoka

 erditzearen ozen,

 lurraren sabel biguna

 goldearen oinazez,

 -zer erditu da, zer eten?-

 oro oihu ta goresmen,

 lur-amak hatsa lodia,

 lurrak hazia goren.

 ta lurrarekin batean

 ene kantua gailen...!