Profeta bati (Jurgi Oteitzari azaldu nahirik)
Aresti, Gabriel
.........
ezpaitdidate esan
nor den
bietatik
emazurzago.
Egia da Oteitzaren eskultura ez dudala
nik konprenitzen,
baina ni eskolarik gabeko gizon bat naiz,
eta hori ez da harritzekoa.
Baina Jurgi Oteitzak nire poesia konprenituko du,
dudarik gabe,
gauza errezagorik ez baitda inoiz
gizonaren eskutikan
atera.
Jurgi Oteitzaren eskultura konprenitzeko
bista luzea behar da,
baina nire poesia konprenitzeko
ez da behar
belarri zorrotzikan,
agian
harek listoentzat eskulpitzen zuelako,
eta nik
tontoentzat
eskribitzen
dudalako.
Nire poesia oso merkea da,
herriaren ahotik hartu nuen
debalde,
eta debalde ematen diot
herriaren belarriari.
Orain Jurgi Oteitza
ez dakit nun
egonen den.
Ni hemen nago,
Basurtun;
gaur kontuak atera ditut
eta etxera bihurturik ikusten dut
oraindik
oraindik
telebista bat erosteko
ez dudala
aski
irabazten.
Bista laburra dut, eta nire sudurraren aurrean dagoena
ikusten dut
bakarrik.
Zer egin behar dudan
inork esan dizaidan
nahi nuke.
Hainbeste atetan jo nuen nire
denborako egunetan,
hainbeste esku bilatu nuen adiskidetasun
bila,
hainbeste andreren aurpegiei so egin nien
karino bila...
Baina orain ez dago bihurrerarik.
Jurgi Oteitzak ez du jadanik
eskulpitzen,
...........