Aurpegi luze

Zabaleta, Pedro Martin

 Mokoti esan ohi zioten,

 mokoti zelako, hitz jario;

 ez rimo, ez rima,

 ta mila txima

 zen mokoti.

 Txapel oker zikinez koroatua

 ile mototx gogor baten gainean,

 mokoti zebilen kaletik kalera,

 hau da, kale egite batetik bestera,

 ez bai zuen asmatzen ezer.

 Egoaldi ona egingo dik gaur,

 esan ohi zuen,

 eta jendea euritakoarekin abiatzen zen karrikara.

 Bai, ze gaur goizean gorri ikusi diat zerua,

 eta, bart ere, euri nahikoa bota zian.

 Orduan, gabardinarekin.

 Han zen mokoti,

 hitz jario.

 Ta poliki-poliki

 mokoti zahartu egin zen,

 egunen batez,

 ego gabaz,

 gabak ere oinen gainean

 igaro ohi zituen-da.