Bedeinkazioa
Baudelaire, Charles
Gorengo botereen agindu bategatik
Mundu hontan poeta agertu zenean,
Bere ama izuan eta biraoz beterik
Jainkoaren kontra dabil, bere haserrean:
"Zergatik eztut sortu sugea ta ziraua,
Altzatu baino lehen nire urkamendia?
Maradikata bedi atseginezko gaua,
Egin zitzaidanean nire galmendia!
"Emakumen artean-baininduzun atara
Oinazea emateko nire senarrari,
Maite-karta bat balitz bezala, garretara
Ezin baitut abere ezain han jaurtiki...
"Gordeko dut galazi ninduen gorrotoa
Zure gaixtakerien tresnaren gainean,
Ta tolestuko dizut arbolaxka gaixtoa
Bere orri-izurtuak legortu artean."
Itotzen da honela gorrotozko aparrean,
ta konprenitu ezinik gura betikorrak,
Irazekitzen ditu Jehenako 'ondarrean
Ama txarrak erretzen omendiren garrak.
Honelaxe aingeru baten ardurapean
Eguzkiz mozkortzen da mutiko joria,
Jandako eta edandako gauzatxo bakoitzean
Topatzen du anbrosia ta nektar gorria.
Aizeagaz olgetan, hodeiekin mintzatzen,
Mozkortzen da kantatzen; gurutze-bidean,
Eta espiritua negarrez da abiatzen,
Alegere ikustean txorien antzean.
Maite nai dituenak so dagozkia bildurrez,
Edo bere jenio onetik ausarti,
Irain egiten diote garratzki eta eurrez,
Erakusten diote direla basati.
Ta jan behar dituen otordu guztietan
Errautsa ta txistua botatzen diote;
Ez sartzeko diotsate oinak bere urratsetan,
Behar dituen gauzak ostu dizkiote.
Bere emazteak dio karriketatik oihuz:
-"Adoratzeko naiko eder aurkitzen nau,
Eta antigualeko gezur-jainkoen moduz
Urreztatu behar du emazte polit hau.
"Akaraz eta intzetsuz, agurrez eta mirraz,
Okela sendoalez, ta ardoz naiz aseko,
Jakiteko egiazki dagokidala miraz,
Jaungoiko-amodioa berari ebasteko.
"Ta zirimonia hontaz aspertzen naizenean,
Nire esku ahul gogorra dida sentituko,
Eta nire atzamarrok beraren bihotzean
Estrata zagritu bat dute zabalduko.
"Ikaraz ta taupadaz dagon txoria antzean
Odolez txit gorria, bere bularretik
Kenduko dut bihotza: desgosetu naiean
Maite dudan orari botako lurretik."
Ta zeruan dakusan tronu ederrerantza
Altzatzen ditu, ekuru, poetak besoak,
Eta hartzen du harri hamorratuen antza
Bere espirituaren txinparta sendoak:
-"Jainko bedeinkatua, mina ematen duzuna,
Gure zikinkerien erremedioa;
Hori da guretzako gauzarik hoberena,
Erakusten baitigu zure amodioa.
"Badakit daukazula leku poetentzako
Lejio santuetako hilara ederretan,
Tronu, Birtute eta Dominazioetako
Komidatzen duzula betirako festan.
"Badakit mina dela noblezia bakarra,
Lurrek eta infernuek eztutena lotzen;
Bilbatuko dut nire koroa zerutarra,
Denborak ta munduak menderatu ondoren.
"Palmira zar hartako harri preziatuek,
Itsasoko bitxiek, urreak, zillarrak,
Eztituzte pobretzen, zure eskutik sortuek,
Diadema dirdirante argitsu ta ederrak,
"Argi garbiarekin, jatorrizko hutsean,
Printzetako sukalde santuan eginik.
Begi 'ilkorrak eztira bere edertasunean
Espillu negar-zulo ta ilun batzuk baizik."