Amolandun bi
Aresti, B.
I
Egun-sentian iaikiten naiz itzar,
haiduru, kopet-argi, begi-zabal;
egunari natzaio dostaliar,
eznaiz nioiz egon honein sendoal.
Ezku malguz ukitzen dut gorputza:
legun, biguin, hazkar, xa'u, garbi, hutza:
alaiki egiten dut irrintzina.
Baina gautzean eznaiz harroputza:
nekez, heiagora-auhen-intzirina;
ukan baitut arrasti'ia negute.
Goizean nuen larrua gantzutu.
Arratsean, helas!, kiratsez bete,
maingu, herbal, gor, karsoil, itsu, mutu;
eztut ulertan zerk nauen ventzutu!
II
Gauza guztien 'zpiritua zara;
lore guztiak arnotu 'ta nahas:
hotzerri-belarra, otea, akara.
Zure urrin hortaz horditu naiz arras.
Gauzen tolesketa gaitza bezala,
behin harroa, hurrengoa apala.
Euritan triste, haizetan barreka:
ur oliatuaz egin erreka.
Gau 't' egun; ilargia, eguzkia;
batan amurra eta edaskia.
Zeu zara ardi kumeduna 'ta antzua.
Zure ezagutza etorri zait garaiz:
astiro, argiro kontaratu naiz
batez zarela zimaurra, gantzua.