Konbentuko sagarrondoa

Alustitza, Julian

 Moja-konbentu bat zan

 patxada osoan.

 Pareta zar gañetik,

 baratzaz barruan,

 sagarrondo aundi bat

 loretan zegoan.

 Erleak "xurru-murrux"

 eren erlauntzira...

 Ene animak iges

 konbentu-kubira.

 Mojatxoak leiatsu

 antxen ari dira.

 Burutik txuri eta

 beltzez gorputz dana,

 moja bakoitza zenun

 sagarrondo bana.

 Ta ezpañetik zerien

 erlearen lana.

 Aizea zinkurinka

 leio-zirriztuan...

 Badabil iskanbilla

 kaleen barruan:

 negarra plaza-buruan...

 Ez-da atsegin munduan!...

 Erleak lanean ta

 mojak errezoan...

 "Xurru-murru" goxoan,

 bake-abaroan,

 begiak laga nindun

 loaren altzoan.

 Loak artu bezela

 ametsetan asi:

 Moja-jantzian nizun

 gorputza ikusi:

 beltzez soñeko dana,

 buru-gaindik txuri,

 ta besoen azpian

 (iruditen neri)

 ego meak ernetzen

 ote ziran ari...

 Azkenekoz orratik

 esna nintzanean,

 begik igurtzi nituen

 ikusi naiean...

 Moja-konbentu bat zan

 patxada osoan.

 Pareta zar gañetik,

 baratzaz barruan,

 sagarrondo aundi bat

 loratan zegoan...