Biotz-agurra
Arrese, Emeterio
Negu beltzean egoten oi dan
bezela txantxangorriya,
otzikaraz ta mutu zegoken
nere barrengo txoriya.
Gaur bat-batean txospertu zaidak,
gaur egun zoragarriya,
lengo ixillaren ordez nik orain
abestaldi bereziya.
Goibel-nagirik iņork ez emen,
baizik zorion-uztargi
ta uztargipean gure biotzak
atsegiņaren urbizi.
Iturri denak mingain zetortzik,
bizkor, eretsu ta garbi.
Gu, beraz, emen zorionezko
ibayan denak igari.
Jai eder onek maitasunaren
urrin gozoa zeriok,
t'aldi berean sortu zaizkiak
bertsokume dantxariok.
Ire omenaz abeskide gu,
biziro alai guziok;
izan ere ik gure pozari
pozik erantzun baitiok.
Nere buruzko epotx ariņa
mintzo eder ta luzerik
egiteko gai ezpada ere
naimena bazerabilkik.
Itz oiek baņo askoz geyago
laztan batek esango dik;
laztan auxe ba ziņez demaiat
beso ta gogo zabalik.