Egiaren lekuan, gezurra nagusi
Enbeita tar Balendin
Barruko kezkak itun narabil
eta ezin naz alaitu,
nere barrenak asetu nai dau
eta ezin da nasaitu,
guzurra argi ikusten nago
egia ezin argitu,
arrazoi bidez justizia nai
eta guzurrez zigortu.
Zelan oinpean egon leiteke
egiaren altasuna?
Eta gezurra beti garaile
nundago zuzentasuna?
Nun da egien alde hil zana
Jaungoiko Seme Gizona?
Inundik ez da erantzupenik
dana da ixiltasuna.
Nun dago baina kontzientzia?
Baztarrean dabe utzi,
Gizatasunen balioa nun?
Osuan egin da jatzi.
Eta Kristoren irakatsiak?
Ez dauka hainbat garrantzi,
gezurra izan ezik besteak
diruak ditu iruntzi.
Egi gaxoa baztertua da
langile pobrientzako.
Eta gezurren urre zidarra
kapitalistarentzako
Bihotzik bako injustizia
lotsa bakoarentzako
kontzientzia, ogi gosean
dagon gixajoentzako.
Bakardadean zalantzan nabil
egiaz jaubetu nairik,
Baina inundik ez dot ikusten
egi aldezko biderik.
Injustizia eta gezurra
daukaguz goiak arturik.
Aita Goikua, zuk zer dinozu?
Egiak ez dau jauberik?
Zalantzan nabil eta ez daukat
inun ere leku onik,
gaur egunian egiak ez du
iņogaz hartu emonik.
Eleiz buruai Itandu eta
ez dogu erantzupenik,
hau ikusita ezin esan lei
Jaungoikua dagoenik.
Euskal Herriai agintariek
berea dautze ukatu.
Eta Eleiza buru batzuek
ukatze hau ontzat artu.
Kaifaz ta Anaz izan baziran
Kristo ebenak salatu
Euskal Herriaz egin dabenaz
ezin legike harritu.
