inprimatu
1980-ko Gabonetako bertsoak
Izenburua:
1980-ko Gabonetako bertsoak
Sinadura:
Luis Baraiazarra
Urkizaren iruzkina:
Egilea(k):
Baraiazarra, Luis

Argitalpena:
Olerti.
Urtea:
1984
Argitalpenaren urtea:
Alea:
1983
Orrialdea:
268

1980ko Gabonetako bertsoak

 

Luis Baraizarra

 

                                                     Sehaskatxoa kulunkatzen da

                                                         sentimentuen hotsean;

                                                 soinu horretan kanta nahi dugu

                                                           bizitzako urratsean.

 

 Eguberriko soinua

 aidean dabil alai

 Belen aldeko izarrak

 egiten digu dirdai.

 Haurtxo Salbatzaile

 hori guri begira ernai

 munduari gogoratuz

 denok garela anai.

 

 Negu gorriko eguzki

 lotsati ta logale,

 odei beltzetan etzanik

 amets tristez hor zaude.

 Lotatik itzarri zaitez,

 denok gara argi zale;

 Eguberriz argi itzazu

 baserri eta kale.

 

 Neguaren arnas hotza

 zabaldu da aidetik

 haren ikutu gordina

 dator leiho-bidetik;

 gizona errenka dabil

 gizatasun aldetik

 hainbat gaiso deika daude

 beren bakardadetik.

 

 Hainbeste behartsu dabil

 bizimodu gogorrez

 gizona nekez ari da

 itsasoz nahiz lehorrez;

 Gabon jaiez elkar poztu

 geure bihotz xamurrez

 Jesus Haurrari darion

 irriño ta agurrez

 

 Munduak hara ta hona

 eman du hainbat bira,

 betoskodun gizartera

 betor argi dizdira;

 Gabon jaiak, goibeldurik

 egoteko ez dira;

 lagun denok bil gaitzazu

 zure irri eztira.

 

 Gizartean nabari da

 borrokaren geriza

 lanaren urritasuna

 gosea eta eza;

 Jesus Haurrak gure Herrira

 bakea ekar beza

 ta borondate oneko

 guztientzat babesa.

 

 Arretaz egon zaitezte

 gure kantu-hotsera!

 urtero garraxi bera

 jendeen bihotzera:

 kanpora joan zirenak

 noiz bihurtu atzera...?

 Euskadi dehadar bat dugu:

 «ATOR, MUTIL, ETXERA»!!

 

 Poztasunez txuri daude

 mendi eta oihanak

 neguko modaz dotore

 lur goietako muinak;

 Gabon-mezuz azkorturik

 gure aiton-amonak;

 herriko haur ta guraso

 denoi ZORIONAK!!

 

 


inprimatu