inprimatu
Bestela ito egingo nauzue, il
Izenburua:
Bestela ito egingo nauzue, il
Sinadura:
Mikel Zarate
Urkizaren iruzkina:
Egilea(k):
Zarate, Mikel

Argitalpena:
Olerti.
Urtea:
1982
Argitalpenaren urtea:
Alea:
1982
Orrialdea:
25-26

Bestela ito egingo nauzue, hil

 

M. Zarate

 

 Ez!

 Ez, ez!

 Ez, ez, ez!

 Ez dut nahi

 gure hizkuntzaren

 zeharkeriazko kutsaduraren

 etangabeko zurrunbiloaren

 zurrupa mareagarriaren

 zorabiozko jirabiraren

 goitika higuingarriaren

 ezinegon larriaren

 bizi ezinaren

 ezinean bizi.

 Ez dut nahi

 lehenaren itzalean

 galduriko euskararik,

 lehenaren lurpean

 ustelduriko euskararik,

 lehenaren urkamendian

 hildako euskararik.

 Ez dut nahi

 hitz, hizki, hizkuntza

 arkaiko ulergaitzik.

 Ez dut nahi axularkeriarik,

 ez dut nahi larramendikeriarik,

 ez dut nahi

 aranakeriarik.

 Ez dut nahi

 sitsak jandako euskararik,

 euskara herdoildu hatsitu momiaturik

 Atera nazazue,

 mesedez,

 faborez,

 otoi,

 museotik,

 kanposantutik.

 Euskara bizi berri batu gazte bat

 nahi dut,

 gaurko arnasa, izerdi ta odolez

 oratua,

 baserri ta hiriz

 osatua,

 gozoa ta garratza,

 leuna ta latza,

 egunerokoa,

 edozertarakoa.

 Atera nazazue,

 mesedez,

 faborez,

 otoi,

 museotik,

 kanposantutik...

 bestela ito egingo nauzue, hil.

 

 


inprimatu