|
Uri barnez
Muniategi'tar Sabin
Uri barnez,
iņurriak bezela kaleak betean,
giza-taldeak aurrera doaz
arinka,
lasterka,
prisaka doaz,
askotan
bata-besteari,
ikusi-mikusi
ta, entzungor egiņik
gizabidezko
agurrari.
Aurrera...
bakoitza
bere lan,
zeregiņetara;
bakoitza
bere arazo,
bere iolas,
ibillietara...
Urduri,
geraka,
arin doaz
prisaka.. .
oņez,
berebillez,
bultziz,
tximistgurdiz
ta, beste olako
tramankulu,
lasterbidez...
Au munduaren gerakatasun
bizi-bear, ibilli estua!
au, gure geiago bearraren
nabarmenkeri egal, itsua!
Nork begiratzen,
luzatzen ote dio
bere biotz,
bere eskua...
menperaturik,
oinpeturik,
min,
oņazepean
ta lurrak ioa
arkitzen dan
lagun urko,
gizaseme zauritu,
eroriari?
O!, ez, ez...
ez degu
ez beta,
ez astirik
oņazepean,
zauripean,
barren-malko,
gogarte itunez...
ez ian,
ez lan,
eskua arrenka luzatuz
argi gosez,
ogi gosez,
nekepean dabiltzanai
laguntzeko.
Au, gizartearen biotzik-ez,
gogortasun gogo biurri!
Ez degu ez
ez beta,
ez gogorik;
ez degu
ez adore,
ez kemenik...
egunon goxo pozgarriz,
arratsaldean egokiz,
gabon zoli aidekorrez,
bidezkoa agurtzeko.
Ez degu ez,
ez beta
ez astirik,
gure egunetan gora,
bata-besteka
gizarteratuz,
bideak mintzo goxoz edertu,
ta, alaitasunak biozturik,
gizon bezela
bizitzeko.
Ez degu ez,
ez anka,
ez bururik,
biotzeko argirik!
Ta, bai, ortxe ibilliko da, bai,
ortxe nunbait, ortxe,
gure Iaungoikoa,
bein ta berriz gure billa,
amaika aldiz gurutzetua.
Ortxe dabil bai
guri deika,
itxasoz,
aizez,
biderik bide...
or,
gauzetan murgildua,
noiz itzar,
noiz bereganatuko
ote geran!
Ortxe
nekazari,
arotz,
argin,
itxasgizon,
izarlari,
txiro ta aberats artean
ere...
bai, ortxe dabil,
langille beartsu,
gizon izarditu,
gizon mindu,
oņazetu guztiakin...
ortxe,
bein ta berriz
guri deika,
noiz itzar,
noiz bereganatu,
noiz gizon izatera
bein ta betiko,
iritxiko ote geran!
|
