Oi, gurutz deuna!

Mendizabal

 Bide-txigor ertsia,

 ixil ta illuna,

 aldatz gora, gogorra,

 arantz saminduna,

 nekegarrizko zama,

 baldar ta astuna,

 Adan'ek len-obenaz

 iriki ziguna...

 Baiñan zein maitagarri

 zeran Gurutz deuna!

 Gaizkillen bildurgarri,

 lotsakizun aundi,

 izan ziñan luzaro

 gizaldiz-gizaldi.

 Baiñan zeru-bidetzat

 Kristok ziñun erdi,

 eta diraun arteño

 ludi onek ludi,

 Zu izango zaitugu

 Maitasun-irudi!

 Oi ikurrin donea! ,

 zeruetako giltza,

 maitetasun utsaren

 opari-oroitza:

 jaso zenun garalle

 Jainkoaren Itza,

 menperatuz Adan'en

 oben-zorigaitza...

 Gurgarri zera Itun

 Berriko Zugaitza!

 Zu zaitugu kristauon

 bizitzan oiñarri,

 ta siñismen-itxaro

 penaren pizgarri.

 Goi-ontasun iturri

 Kristok ziñun jarri,

 gizon oron arteko

 maitasun-lokarri,

 ta zerura garaman

 zorion-uztarri!

 Apal, garbi biziaz,

 Kristoren araura,

 griña txar guzitatik

 nadilla ildura!

 Gaizkillen onagatik

 iltzea dut gura,

 Gurutz-bizitza bidez

 sar nadin zerura,

 ikus dezadan, ikus,

 Zugan il zan Ura!