inprimatu
Poetika
Izenburua:
Poetika
Sinadura:
Inazio Mujika Iraola
Urkizaren iruzkina:
Egilea(k):
Mujika Iraola, Inazio

Argitalpena:
Plazara.
Urtea:
1991
Argitalpenaren urtea:
Alea:
17.zk.
Orrialdea:
27

 

Poetika

 

Inazio Mujika Iraola

 

 BAT

 

 Neskaren ileadatsetan kausitzen da

                 Granada

 ez beti Granada, sarri Andaluzia osoa ere

 Fuentevaqueros eta Viznar

                 —Alfa/Omega—

 Eta New York. Batez ere New York

 zeinaren zerua den buruz behera ezarritako

 beste etxeorratz ilera erraldoia

 ñabar kolorez jazten dena, gaua

 —emazte beltz kokorikatu hori—

 hiriko orratz-ohantze gainean etzan aurretik

 idi akitu baten marruma betierekoa adituz

 aharrausi ahantzi baten antsia bailitzan.

 

 BI

 

 Neskaren sexoan zegoen Alexandria

 eta Ziutateko Poeta zaharra pasiran zebilen

 moila-mingain perfumatuetan barrena

 ostatu hitsetako musika liluragarriak

                 lagun eta gidari.

 Eta neskaren sexoa zen Poetarentzat

                 harresi

 eta murru altu helkaitzen barruan

 hamazazpi, hogeitabi eta adin orotako

                 mutilak

 eguzkitan bezten ziren biluzik,

 belaze infinitoetan etzanda

 bainuaren hoxkarra ahantziz.

 Eta Van Gogh erara izartu gau azpian

 mahaiara bildu eta ardo urtetsua

 edaten dute elkarrekin

 jainkoek ausartentzat berariaz

 esleitutako ontzian.

 

 HIRU

 

 Neskaren bular-erretenean kokatzen omen da

 Santo Estefano Bolbo

 eta muinoak zeharkatzen ditu Poetak gauero

 ilargiaren argitan, zurbil, erratu

 eta muinoetako ikusmiran suma ditzake

 sutzarrak esaterako

 herri txikietako berbena argitsuak

 karruselak

 suma dezake mahasti ubeldua aihenatzen

 ilargiaren estela metalikoan gora

 edota Torino, uda eder hartan

 Hotel Roma, ohe bat.

 

 LAU

 

 —Hegats zabaleko boneta biguna

 zeinak babesa damaion ileadats luze horailari

 larruzko abrigo ederra neguan

 teatro eta sala beroenetan ere irribarre

 udan terziopelozko jaka

 kaltza laburrak eta muga-mugan hasita zetazko galtzerdiak

 zapata eskotatu txarolezkoetan galtzen direnak

 zilarrezko ebilak noski

 atorra Byron moduko lepoz

 enkajezko eskumuturrak eta fantasiazko parpailekin

 bi irudimenezko erremate:

 txalina berde ala gorrimina eta

 lore freskoa, lirioa, ojalean

 eskuartean lizun laztanduz eguzkilorea

 begitartea maskara multipleen pean ezkutaturik

 eta begiak, ai begiak!

 ibaiaren mirailean beti jarriak

 eta ibaiaren mirailarenak Poetarenean.

 

 —Dama gorrien abaniko beltzak ilunabarrean

 Eta tristeziaren trosta eroa, jendetzaren burla itsuz geltokian

 Pazientziarik ez da existitzen leotza ospelean

 Reading, C.3.3, Sebastian Melmoth

 Oinazearen bufoiak, maskararik ez oraingoan

 —Finish— pitzatu da miraila,

 pUbertaro loreak zapalduz egunero

 Noraezaren agonia ahalgetuan

 Diamantezko

 Irla ezkutu

 Suaberantz... Carette Avenue 89 paté

 

                                   —Pire Lachaise—.

 

 


inprimatu