inprimatu
Kaxkabera
Izenburua:
Kaxkabera
Sinadura:
Juan Kruz Igerabide
Urkizaren iruzkina:
Egilea(k):
Igerabide, Juan Kruz

Argitalpena:
Plazara.
Urtea:
1985
Argitalpenaren urtea:
Alea:
3.zk.
Orrialdea:
31

 

Kaxkabera

 

Juan Kruz Igerabide

 

         Inork kasorik egiten ez bazion ere, maite nuen benetan agure xahar

 hura. "Hori burutik jota zegok; horrela jarriko haiz herori ere" esaten zidaten

 lagun eta familiakoek. Baina, berarekiko solasa oso laket zitzaidan. Jakina,

 haren hitzak ez ziren zeharo zentzuzkoak; beste dimentsio batetan isuritakoak

 zirela esango nuke; neri, ordea, atsegingarri egiten zitzaidan haren mintzoa.

 "Ilustrazio kixkurrezkoa", zioen.

         Badakit Kaxkabera (hala deitzen zioten) literatotzat hartzea trufagarri

 izango litzatekeela askorentzat, baina beraren omenez, berriki hila bait da,

 grabaturik daukadanaren zati kuttun bat argitara eman nahi nuke. Bere erotasun

 xamurra ez ote zen gure mundu hau baino zentzudunago?

         "Begira motel: zerurik ez zegok. Ilargiaren inguruko ezerezko loresoro

 batetara joaten dituk hildakoak, ezerezko bihurtzen direnean. Mundu fisikoaren

 ezerezaz ari nauk noski, eta badakik.." zioen. Bihoakio, ezerezko arrosa sortan

 tolesturik, izarretaraino doakeen oroitzapen hau.

 

                         (Grabaketa)

                 "Txistu zorrotzak

                 kilimatu zidan bularra

                 errainu beroz.

                 Arantza eta asunaren

                 toleste desesperagarriak

                 sasibidetan zehar ninderaman.

                 Ahape kuxkurtuaren zaintzaile tristea

                 ezpain kizkurtuak hozkatuz,

                 hitz bahituen burdinlanga,

                 letagin izoztuak.

                 Eta tartetatik kopla errenak,

                 eriak, eroak, aldegin nahiez...

 

 Katearen betazala

 Mailuaren azkazala

 Gure dotea

 Borondatea.

 

 Martxoko lore azkarrak

 Hosto gazteen batzarrak

 Oilarrarena

 Goizeko pena.

 

 Apur dezagun ustea

 Zabal zabalik atea

 Erein artoa

 Maite astoa.

 

 Zure aurpegi garbia

 Artizarrak igorria

 Begi ņabarrak

 Zapi goiztarrak.

 

 Zopa gosaltzen eroa

 Sutatik dator beroa

 Ireki lotsa

 Miatu poltsa.

 

 Zerua panpox da jazten

 Txoriak dantzan jolasten

 Itsu harria

 Ilun argia.

 

 Eguzkiaren mototsa

 Kanpandorretik ahotsa

 Nora zoazte

 Oilanda gazte.

 

 Jaio ginaden errenak

 Satsaren usain beltzenak

 Koplaren penak

 Min zorrotzenak"

  

 


inprimatu