Samaritar ona

Irisarri

 Iudatar gizon bat bidez bide zoan,

 eta ara! lapurrak atera zaizkio;

 soildu dute murritz, billustu, gogor io

 ta zauriz iosirik utzi bid'ondoan.

         Ta naiz aunitz iende dabilan gero an

 (aberats, andiki, apez ta erriko)

 guziek ikusi ta aurrera igaro...

 gaizo ura inork ez artu gogoan.

         Arrotz bat zitzaion azkenik aurkeztu;

 ark zauriak xautu, lotu t'ostatura

 darama poliki bere aberean.

         Ta gero deus ere kupidetsi eztu

 asti, diru, neke, lanik, gizon ura

 oso ta sendorik ikusi artean.