Azi ona ta azi txarra

Irisarri

 Goiz goizik, bataio sainduari esker,

 Iaunak erein zidan ariman barrena

 lurrik onenean azirik onena

 onbide guzien anbat azi eder.

 Ni berriz ero au lo egon nai alfer,

 ez landu ta zaindu nere lur gizena;

 etsaiak soildu dit artean den-dena,

 bere azi txarra iraurriz or leher.

 Ta belar gaiztoak sorturik indarrez,

 ito urren dute Iaunaren garia,

 asuinez iosi da, karduz ta laarrez.

 Iauna, zuk alor au iorra, garbi, txukun,

 gaurgero dakardan uzta ugaria

 ta zure sabaira gero bil nazazun.