Zoaz bakean!

Irisarri

 Simonen etxean Iesus bazkaitarat,

 Aren inguruan iendea multzuka;

 ta ara non sartzen den an itsumustuka

 andre bekatari gaizki aipatu bat.

 Aozpez erori Aren oinetarat

 ta asi da oieri besarka, musuka,

 nigar-malkoz busti, bere ilez xuka,

 ta urringai onez gantzutzen berebat.

 Bertze maikideak marmar elkarrekin,

 begiak iraultzen iguinez betizu

 «Utikan, ematzar, likits, lotsagarri!»

 Ta Iesus... gozoki aren alde iarri:

 «Zure bekatuak barkatu zaizkizu,

 zoazi bakean, ez berriz utsegin.»