Mendiz bertzaldeko...

Iratzeder

                                                           Aita Donostia zenari.

 Mendiz bertzaldeko Eskual-Herria

 Ezin geiago zait xoragarria.

 Badu bihotzeko Su pizgarria

 Zainetan indarra, soan irria.

 Alde huntako Eskual-Herria

 Etzait gutiago maitagarria.

 Eztu bertzean den suzko-jauzia

 Bainan bai: Goxoa eta Neurria.

 Indarra eta sua ez othe dire

 Denen pizgarriko iduzki-lore?

 Goxoa, neurria ez othe dire

 Zeru urdinaren soaren pare?

 Bai, han bada neurri, bainan ez aski

 Ai, hotzik argitzen suak balaki!

 Bai, hement bada su, bainan ez aski

 Ai, zeruan bethi balitz iduzki!

 Su neurri-gabeak zoin maiz dituen

 Goxoa, neurria itho-arazten!

 Neurri su-gabeak zoin maiz dituen

 Indarrak titiltzen, gogoa histen!

 Hangoek balute suan neurria,

 Guk aldiz baginu su pizgarria,

 Mendiz bi aldetan zer Goiz-argia,

 Salbu bailitake Eskual-Herria!

         . . .

 Eup! Eskualtzaleak, altxa burua

 Erdal-espantuka utziz mundua.

 Gainez gain elgarri eman eskua

 Pitz dakigun berritz elgarren sua.

 Ez dadila izan, gure galgarri,

 Lokarri gabeko bi Eskual-Herri,

 Har elgarren ganik bai su, Bai neurri;

 Jos, eskual-indarka, denek elgarri!