Gorrak begia belarri
JosAnton Artze
Gorrak begia belarri
itsuak, belarria eta eskua begi
mutuak eskuak mihi... eta begiak hitz.
Gizasemea ahoz
mintzo da baten ere...
emakumea begiez!
Bihotzetik ahora
egia gezurtu daiteke bidean.
Eta bihotzean egia zena
ahoan gezur izan.
Ez bihotzetik begira bidean tarterik ez
bihotza bera baita
mintzo dena begian.
Kontuz zeure begiokin
bi ahoko ezpataz baino barrenkiago
zauri dezakezu eta gutxiena uste duzuna
begiratu zabar batez
zaindu zure begiok
lantzarik luzeenak egin dezakeen
zauririk sakonena baino
are zauri sendakaitzagoak
goxa eta senda ditzakezu eta erabat
begiratu soil xamur batez.
zorionean garenean,
zorigaitzaz ahazten
eta zorionaz ez oroitzen;
guztiaz ahaztuz,
ezertaz ez oroituz.
zorigaitza heltzean
ez gara zorigaitzaz ahazten
eta bai biziro zorionaz oroitzen
guztiaz gara oroitzen,
ez gara deusetaz ahazten.
zorionean zorionaz oroitzen ez eta
are zorion iturriaz ahaztenago garenok
zer behar ote dugu
oroitzekoaz ahatz ez gaitezen
eta ez ahaztekoaz oroit ?
Ez ote beste biderik?
zorigaitzak jo behar ote,
genuen zorionaz, ez dugunean bederen,
ohart gaitezen?
Begiak galdu behar ote,
ikus genezakeenean ia begiratu ez geniona,
ikus ez dezakegunean ikus dezagun?
Hala gertatu ohi zaigu
zorionaldian ez dugunoi ikusten
zorigaitzak etorri behar guri, errukiz,
ikusten laguntzera.
zeren, zeren, zorigaitzak astinduko ez bagintu aldizka,
esnatuko ote inoiz lotan dagoen zenbait,
egun argitan ere esnatu ezinik
ametsetan dabilen hainbat?
ikusiko inoiz, bestela,
inoiz zakarki jipoitzen gaituen ukabil gogorra,
arestian leunki laztantzen gintuen esku biguin berbera dela?
zorionekoa, bada, zorigaitzak astintzean,
baldin zorionean ikusten ez zuena
zorigaitzak ikuserazi badio;
zorigaitozkoa bazen zorionean
ikusten ez zuelako,
zorionekoa baita zorigaitzean
ikusten duelako.
zorigaitzak ez baligu tarteka hortzak erakutsiko,
zeini litzaioke zoriona zorion?
Ez gu bezalakoei behintzat.
zorigaitzak astinduko ez bagintu aldizka,
esnatuko ote inoiz lotan dagoen zenbait
egun argitan ere esnatu ezinik
edo, ugariago, esnatu nahi ezik,
ametsetan dabilan hainbat?
eguzki berberak ohi duen bezala
hor izotz gogorra biguintzen,
han buztin biguina gogortzen,
berdin-berdin zorigaitz berberak
bihotza samurtzen batzuei, esnatu nahi dutenei,
are gogorragotzen aldiz besteei, esnatu nahi ez dutenei.
zorigaitz bera hark bedeinkatzen,
honek madarikatzen;
hark bedeinkatuz, zorigaitza zoriontzen,
honek madarikatuz, zorigaitza gaiztoagotzen!
Bada ez bada ere, ez ote genuke hobe guztiok
ez ote genuke arreta berezi batez,
ohi dugun baino zorrozkiago,
begiratu behar batik bat
zoriontzat daukagun zorion zoriontsuari,
ea benetako zorion dugunez,
eta zinezko zorigaitza,
zorigaiztzat daukagun zorigaitz gaiztoa den.
Bada ezbadakoa baino, baitezpadakoa da kontua,
gerta baitakiguke erraz asko,
sarritsuegitan gertatu ohi zaiguna:
zoriontzat geneukana geure zorigaitzerako izatea
eta zorigaiztzat geneukana zorionerako.
zerk dakigun on eta zerk kalte ez jakiteak bezala
ezer gutxik baitigu kaltea kalteagotzen
eta ona batere ez hobeagotzen.