Gerla Handia
Matxin
-1-
Ene izpirituan hasten naiz pentsatzen
Gizonaren bizia zer ote zitaken
Egia ez da errex zuzen esplikatzen
Ainitzen justizia ez dut ezagutzen
Gu penaz higatzen
Elgarren xahutzen
Bat bertzea hiltzen
Odola ixurtzen
Aberatsak urrundik irriz asetzen (bis)
-2-
Mila bedatzi eunta hamalaugarrena
Agoztuko ilaren lenengo eguna
Europako gerla bat hasi izan dena
Frantzian azkar ginen bazela zuzena
Legea emana
Denentzat berdina
Gerlako on dena
Biltzeko ordena
Baina eskapatzen da diru duena (bis)
-3-
Partitu ginen beraz guziak herritik
Gure familietan penetan utzirik
Haur ttipi zonbaitekin andrea bakarrik
Gizona penatua hor ez da dudarik
Orduaz geroztik
Dabilenak xutik
Zerbait ikusten dik
Penaren partetik
Hilak bere konduak eginak ditik (bis)
-4-
Zonbait gizon alferren kaprizia gatik
Jende miserabliak hor pekatzen ditik
Ainitzek ez diagu ardit baten lurrik
Bertzenaren ontutzen gabiltzak bakarrik
Aberatsetarik
Ainitzak segurik
Urrun dituk sutik
Beldurraren gatik
Gu hemen hiltzen hoien manuen gatik (bis)
-5-
Izpiritu duenak errex du pentsatzen
Gure diferentzia zonbatekoa den
Haundiak ari dira ttipien manatzen
Pobrearen indarrez galonez altxatzen
Ohorez haunditzen
Mirailez beztitzen
Diruaren biltzen
Intresen doblatzen
Gu horien manutik elgarren hiltzen (bis)
-6-
Gerla hunetan parte izatu duenak
Segur ezagutzen dik zer dituen penak
Gogoan baitituzte aita amen griņak
Bertze zonbaitek aldiz andre ta haurrenak
Lagun baduenak
Berak ere lanak
Gau eta egunak
Irriskuan denak
Zer konda behar likek hiltzen ez denak (bis)
-7-
Zonbat amaren seme dolorez haziak
Hemen uzten dituzte gaixoek biziak
Iņorantzia batez hunat etorriak
Hekien plazak dira nigarringarriak
Orobat erdiak
Beltzez estaliak
Odolez betiak
Inozent trixtiak
Zonbait alferren gatik hoiek guziak (bis)